Glade tider i Brugata
Han har drive restaurant i Malaga i fem år, «babylonske» Edmond, som no har opna Happy Time-restaurant i Os sentrum.
Bildeserie:
Happy Time, som har overtatt lokalet Big Chef dreiv restaurant i frå oktober til januar, er no i drift.
– Det passar i grunnen bra at det er påskeferie, at vi får ei litt roleg innkøyringsveke, seier eigar, Edmond frå Sverige.
Familien, kona og dei tre borna, bur framleis i Sverige, der Edmond har drive restaurant før. No har familien hans Happy Time-restaurantar i Oslo, Stavanger, Bergen og Os.
Like små plassar
– Eg liker små plassar der du kan bli kjent med kundane dine. Eg ønskjer å bli kompis med alle, seier Edmond, som no vil flytta frå Bergen til Os.
Den eine veggen i lokalet er pryda med gamle bilde frå Osøyro. Langveggen skal òg få dekor.
Nytt golv er lagt og lokalet er ominnreidd for betre plassutnytting, med kasse ved kjøkkenet, som òg er utstyrt på nytt.
Kan utvida vidare med pub-krok
Han er assyrisk kristen frå Irak og kom til Sverige i 1994. Sidan har han blant anna jobba i Tyskland og drive eigen restaurant i den spanske byen Malaga i fem år.
– Har du ein spesialitet?
– Ja. Pizza! Men kebaben vår er òg populær.
På menyen er det, forutan pizza og kebab, hamurgere, dagens suppe og ulike smårettar.
– Barnemenyen er viktig for oss, seier Edmond, som tydelegvis har lært frå Spania, med bilde av rettane på menyen.
– Kva med ein hjartepizza til dottera og ein pizza forma som ein fisk til sonen?
Ein del av lokalet står førebels avsperra med glasvegg og uinnreidd.
– Når vi har kome i gang, og om alt går bra, så lager vi ein liten eigen avdeling her med ein bar med øl og vin.