Folkehagen opnar snart - med hagefest for alle
Snart kan alle få planta «hos presten».
I ei nyhendemelding inviterer Bjørnafjorden kommune til opning av folkehagen ved og ikring prestegarden på Os.
Opninga er førstkomande laurdag, og alle er velkomne.
Bollar og saft, arkitektur- og kulturhistorie i tillegg til historiske leikar er å oppleva på hagefesten.
Prestegardshagen har fått frukttre, bærbuskar og plantekasser.
Og nokre av dei eldste bygningane i kommunen er der, som har husa prestar i 670 år.
Nye skilt formidlar fortida
Borgstove og Glasstova er to av desse. Dei har blitt oppgraderte og fått blå skilt.
Blå skilt presenterer kort kulturhistorie, og fortel om ein bygning, historisk hending eller person knytt til staden.
Fortidsminneforeningen Bjørnafjorden har lagt ned arbeid for at Borgstova og Glasstova skal ha desse merka.
Ei grøn lunge for alle
Prosjektet "Folkehagen" er ein del av oppgraderinga av uteområdet ved Os ungdomsskole, Os Aktiv og kunstgrasbanen på parkeringshuset.
Det er kultureininga og prosjektavdelinga i Bjørnafjorden kommune i tillegg til Landbrukskontoret, som har arbeidd med dette.
Hagen skal vere tilgjengeleg for barne- og ungdomsskuleelevar i nærleiken, og brukarar av dagsenteret Kontakto.
Det er ordføraren som opnar hagen og avdukar skilta på laurdag.
Da skal også kultursjefen Erik Vangenes fortelja om prestegardshusa og planen for framtidig bruk.
Dette er resten av programmet:
- Landbruksrådgivar Heidi Gaustad fortel om ideen bak og meininga med folkehagen.
- Leiar i Fortidsminneforeningen Bjørnafjorden, Ingebjørg Astrup, fortel om blå skilt-prosjektet før skilta blir avduka.
- Paktaren og Borgstova er opne for publikum.
- Prøv stylter, hestesko og sprettepinn.
- Historisk quiz.
