Fleire store firma vil til Os

Fredag for ei veke sidan blei Nasjonal transportplan lagt fram, med pengar til blant anna E39 Svegatjørn-Rådal.

Les òg: Jubel for E39

No blir det byggestart vinteren 2013-2014. Så kjem ein byggeperiode på 5-6 år før reisetida mellom Os og Bergen blir halvert.

– Responsen frå næringslivet kom raskare enn eg hadde trudd, seier ordførar Terje Søviknes.

– Vi har lenge sagt at Os kjem til å bli svært attraktiv når klarsignal til ny veg kjem. Det er kjekt å få dette stadfesta og overraskande at det skjer umiddelbart.

Internasjonale handelskjedar

Den siste veka har ei rekkje bedrifter kontakta Os kommune og ordføraren for å orientera seg om Lyseparken, det komande næringsarealet i Endelausemarka.

Endelausemarka er ubygd land og einaste stad E39 ikkje er i tunnel mellom Os og Bergen.

– Det er både nasjonale og internasjonale firma, store selskap innan handel, som har tatt kontakt.

– Denne typen verksemder har nærleik til stamvegar som ein av dei viktigaste faktorane når dei skal etablera seg, no ser det ut som om det er fleire som vil posisjonera seg rett sør for Bergen.

Anbodskonkurranse

Os kommune har ute anbodskonkurranse på utforming av Lyseparken, dei vil ha ein heilskapleg plan for næringsområdet i Endelausemarka.

– Fristen går ut neste vek og interessa har vore god.

Ut frå dei som har meldt seg vil kommune velja ut tre aktørar, som alle blir honorert likt, sånn at kommunen kan, saman med den av dei tre som blir valt, bruka idear også frå dei to andre.

Tomter og hotell

Ikkje all respons har handla om storhandel. Nokre av dei som har tatt kontakt har spurd om komande bustadområde og vist interesse for å sikra seg tomter for bygging og vidaresal.

– Kva med hotelltomta ved Oseana?

– Førebels har det ikkje vore andre aktørar på banen enn dei vi allereie har dialog med. Det er ikkje utelukka at andre kan koma på banen, men vi held fram kontakten med OBOS og Hotell Gruppen.

Les òg: – Ein flott plass å driva hotell