Fleire nye viste seg fram

Bildeserie:

Full skjerm

1 av 7

Laurdag hadde midtbanespelar Andrej Nemec (22), forsvarsspelar Lukas Horvath (26) og angrepsspelar Patrik Bujna (28), alle frå Slovakia, si første trening med Os sitt A-lag.

Søndag var det treningskamp.

– Vi fekk ikkje tak i ekstern motstand så vi sette opp 11 mot 11 frå eigen gruppe, fortel Ørjan Håland, juniortrenaren som er med å ta hand om A-laget medan Os Turn jaktar på ny hovudtrenar.

Frå før har klubben signert Lars Bakkerud som sportssjef.

Moldskred til Os?

I tillegg til dei tre frå Slovakia var det fleire Søre Neset-spelarar på banen, blant anna Emilis Zilinskas, og dei tidlegare Os-spelarane Erik Kanestrøm, Tore Valvik og Mats Cato Moldskred.

– Eg har trent med Os nokre veker no, seier Moldskred, som har spelt to sesongar på nest høgaste nivå i Sverige, med Superettan-laget IK Brage.

Etter at Brage i haust rykte ned blei kontrakten hans ugyldig. Kva som skjer no er uvisst.

– Det er mogleg det dukkar opp eit tilbod, det skjer ofte fort i fotball. Men akkurat no synest eg det er veldig kjekt å vera på Kuventræ igjen.

Også for Kanestrøm sin del er det uavklart, men ikkje umogleg at han blir å sjå i gul drakt igjen.

Toppskåraren gjekk etter sommaren til Nest-Sotra, som rykte opp til Adeccoligaen. Det er førebels ikkje klart om han blir verande på Sotra.

Talent frå Brann til Os

Ein spelar som markerte seg positivt på fleire måtar i går var ungdomen Kenneth Gjerde.

Gjerde er fødd i 1997 og har bakgrunn frå Brann og kretslaget. Han har også vore i Köln og vist seg fram.

– Eg flytta til Varåsen i fjor og har bestemt meg for å byrja å spela for Os, seier stortalentet.

I går hadde han både målgjevande pasning og ei veldig fin skåring i treningskampen.

Utlendingane imponerte

"Good!" "Good!" "Good!" høyrde vi Håland ropa til dei tre gjestespelarane frå Slovakia.

Midtbanespelar Nemec, som også imponerte på treninga laurdag, viser godt blikk, held høgt teknisk nivå og var spesielt god på å koma seg ut av eller gjennom tronge situasjonar, og på å senda stikkarar gjennom til kantar og spissar.

Kantspelar Bujna viste, som bestilt, høg fart, stor duellstyrke og gode innlegg.

– Midtstopparen, som var involvert i mest slik spelet utvikla seg i går, imponerte skikkeleg. Han har god plasseringsevne, er trygg i lufta og god med ball i beina, seier Håland.

Det sportslege apparatet på sidelinja var nøgd med dei tre, og dei etablerte Os-spelarane skal etter kampen ha gjeve tydelege signal om at dette er ønskte nye lagkameratar.

– Det har vore fine dagar her til no og vi har godt inntrykk av klubben og spelane. Det er høgt tempo med ball og fin fotball dei speler, synest dei tre etter kampen.

I dag er dei tre på tur til Bergen med dagleg leiar i Os Turn, Hans Pärnefält. Tysdag har dei si siste trening med Os før heimreise, kanskje med ein kontrakt i lomma som fører til flytting til Os i januar.

3-1 til Os i kvitt

Gårsdagens treningskamp enda med 3-1-siger til den halvdelen av stallen som spelte med bortedrakter.

Gruppene var delt inn med noko ekstra defensiv styrke på dei med bortedrakter, og dei med mest offensiv erfaring på dei i gult.

Men Dani Bergstø og Lukas Horvath i kvitt plukka vekk så mykje i midtforsvaret at dei gule, som blant anna hadde Christer Olsen, Egil Thuen, Mats Cato Moldskred og Erik Kanestrøm, saman med dei to offensive frå Slovakia, måtte sjå seg slått av det defensive lage med junior-angriparane Sander Kvittingen, Aksel Skaar, Kenneth Gjerde og Emil Halvér i front.

Sander Kvittingen sette inn 1-0, Aksel Skaar 2-0 og Kenneth Gjerde 3-0 før Andrej Nemec reduserte til 3-1.