– Fekk ein ekstrarunde på to år

Solgulls, og seinare Musikkverket, var i 20 år ein populær butikk og samlingsplass for musikkinteresserte.

Over 20 tilsette og tidlegare tilsette møtte fram hos butikksjef Tor Owe Rennemo siste opningsdag.

Les òg: – Ein mange kjem til å sakna

Men Rennemo dukka fort opp igjen i ein musikkbutikk i same senter, då Musikkverket la ned opna Playcom.

– No blir det dessverre slutt for Playcom òg. Vi hadde ein god start, men så likna omsetnaden fort meir på den vi hadde før vi la ned, seier Tor Owe.

– Vi visste det ville bli tøft, og no er det snart slutt. Måndag 28. februar er planlagt som siste opningsdag.

Ny butikk er på veg inn. Dressmann, som skal opna på AMFI Os i april, overtar lokalet, som skal bli utvida.

– Det er vemodig, men eg fekk meg no ein ekstrarunde på to år, seier Tor Owe, som allereie er i gang med å søkja ny jobb.

– Fleire årsaker

Tor Owe trur årsakene er fleire til at Playcom ikkje har selt godt nok.

– Vi har hatt litt betre prisar enn Musikkverket, men sjølv om vi ligg ved kafeen var nok lokalet nede ved utgangen betre.

– Men hovudårsaka er nok auka konkurranse, ikkje berre med nedlasting av musikk og filmar frå nett, men med fleire forhandlarar av musikk.

– Når bensinstasjonar, daglegvarehandlar og elektronikk-varehusa dumpar prisar på fleire av dei største nye albuma blir det tøft å driva faghandel.

– Det får vera grenser

Stamkunde og kamerat Knut Jacobsen synes også det er vemodig at musikkbutikk nummer to blir lagt ned på senteret.

– Men eg trur det kjem til å opna ein ny snart, anten på senteret eller i Os sentrum.

– Greit at det skjer mykje på internett, men det får no vera grenser.

Jacobsen meiner det å gå i hyllene å leita etter god musikk er ei heilt eigen oppleving.

– Å snu på ting og prata med dei som jobbar her har ein heilt eigen verdi. Os er i vekst og eg kan ikkje forstå anna enn at det må vera marknad for ein musikkforretning, kanskje ein litt mindre ein, i ein kommune som Os.