Fekk 72.000 i bot
Vogntog-førarar frå Aust-Europa fekk svi etter brot på kjøre- og kviletid. Natt til laurdag tok politiet fleire syndarar i trafikken.
Tysdag blei førarane av eit vogntog tildelt kjøreforbod etter at vegvesenet hadde funne grove brot på kjøre- og kviletida.
Først fredag fekk dei kjøra vidare, etter å ha punga ut med heile 72.000 kroner i bot.
– To sjåførar hadde skifta på å kjøra vogntoget, og dei hadde kjørt i 16 døgn i strekk, fortel politibetjent Rune Fimreite.
Dette gjev naturlegvis det utanlandske selskapet eit stort konkurransefortrinn i både pris og leveringsid. Samstundes kjem dette inn under kategorien menneskehandel, dei tilsette jobbar under kritikkverdige forhold.
– Kvar av sjåførane måtte ut med 6000 kroner, selskapet fekk 60.000 i bot, fortel Fimreite.
Tungt lasta varebil?
Klokka 16.30 fredag fekk politet melding om ein tungt lasta varebil med ein tung hengar.
– Bakakslinga og hengarfestet skal ha sett ut som om det nesten var nedi. Bilen, som tilhøyrer eit fliseforma, blei stoppa, men funnen ok.
Høg fart og kryssing av sperrelinjer
I 1.30-tida natt til laurdag møtte politiet ein bil som dei synast heldt høg fart i Halhjemsmarka.
– Føraren fekk ei åtvaring og episoden er loggført, i tilfelle noko liknande skjer fleire gongar.
20 minutt seinare blei ein bilførar stoppa på Flåten. Han hadde kryssa sperrelinjer ved Amfisenteret og fekk bot.