Fann levande kvinne i ruinane

Måndag morgon reiste osingen Erik Walden og tre andre frå Hordaland saman med resten av NORSAR på veg til Nepal for å driva søk og redning etter jordskjelvet laurdag for ei lita veke sidan.

Grunna dårleg kapasitet på flyplassen i Katmandu måtte det norske redningslaget landa byen i Baku i nabolandet Azerbaijan.

– Det er mange turistar på veg ut av Nepal og mange redningslag på veg for å hjelpa. Vi blei verande i Baku rundt eit døgn før vi kunne fly til Katmandu, fortel Erik Walden til Midtsiden torsdag ettermiddag norsk tid.

NORSAR landa i Katmandu klokka 03.15 natt til onsdag norsk tid.

Fann levande kvinne i ruinane

Det norske redningslaget NORSAR hadde berre vore i Katmandu i rundt eit døgn då dei torsdag morgon norsk tid fann ei kvinne som framleis, fem dagar etter jordskjelvet levde.

– Det var isrealarar og franske redningsfolk i dei same ruinane. Dei meinte å ha høyrd nokre lydar og delar av teamet vårt gjekk inn med hundar, som markerte funn.

– Søket heldt fram med avansert utstyr til søk og redning. Det er ustabile massar og søkearbeidet kan vera risikabelt, fortel Walden.

I ruinane fann dei to kroppar, eit lik og ei kvinne som levde. Kvinna sat fast, men fekk hjelp av norsk helsepersonell fram til ho blei frigjort frå massane ho var begravd i.

Gav nytt håp til alle

Walden og resten av NORSAR lossa flyet sjølv og brukte berre rett over ein time på å rigga camp inne på ein fotballbane på eit militært område rundt eit kvarter frå flyplassen.

– Ein norsk ambassadør ordna med passkontroll og vi blei henta av ein militærbuss. Mange nasjonar har kome med redningsteam og vi har camp rett ved De arabiske emirater.

Militæret held vakt rundt leiren. Erik fortel at både soldatar og sivile er takksame og glade for den internasjoale støtta.

– Funnet av kvinna var også med på å gje alle nytt håp. Fleire andre nasjonar, i tillegg til dei lokale, har drive søk i fleire dagar utan å finna noko. No er alle ivrige etter å stå på vidare.

Kjem seg ikkje ut til dei verste områda

NORSAR og fleire andre redningslag har til no berre drive søk i utkanten av Katmandu, men hovudstaden er lang frå den byen som er hardast ramma.

– Øydelagte vegar gjer at det er vanskeleg å koma seg ut på landsbygda. Vi er fleire som håper at vi snart skal koma oss ut der behovet for hjelp er størst, seier Walden.

I tillegg til hundar og godt utstyr sit det norske teamet på mykje helsekompetanse, blant anna med lege.

Nepal har rundt 29 millionar innbyggarar. Nesten 6000 er til no meldt omkomen, over 11.000 er skadd.