På veg til Nepal
Osingen Erik Walden er ein av fire frå Hordaland som reiser til jordskjelveramma Nepal for å hjelpa.
Bildeserie:
Søndag blei Erik Walden med fleire i Norsar (Norwegian search and rescue team) bedt om å reisa til Nepal, måndag morgon gjekk flyet.
– Då var det berre til å pakka sovepose og innerklede og koma seg til Oslo, seier Erik til Midtsiden.
Norsar består av erfarne folk frå Norske Redningshunder og Oslo brann- og redningsetat (OBRE). Walden er både medlem av Norske Redningshunder og brannmann i full stilling i Bergen og i deltidsstilling i heimkommunen Os.
I går reiste han til Oslo saman med tre andre frå Hordaland, Jarle Mjånes, Alf Lund og Leif Gullstein, måndag klokka 6.30 sette dei seg på flyet saman med resten av Norsar for å fly mot Nepal.
10 dagar med søk og redning
Søndag kveld gjekk med til informasjonsmøte og klargjering.
Walden fortel at Norsar vil unngå å bruka lokale ressursar, og derfor er sjølvforsynt i 10 dagar.
– Det einaste vi treng når vi kjem fram er drivstoff og transportmiddel. Vi har med oss alt frå mat og dopapir til telt og kokeutstyr.
– Eg veit ikkje kor lenge vi blir verande, men truleg skal vi i første omgang yta ein innsats i rundt 10 dagar.
– Krevjande terreng
Det var laurdag i 12-tida lokal tid at Nepal blei ramma av det kraftigaste jordskjelvet sidan 1934.
Over 3200 er meldt omkomen etter skjelvet, som målte 7,9 i styrke og ramma minst 29 av 75 distrikt i landet.
Walden har vore på utanlandsekspedisjon før, men det var som privatperson i kano gjennom store delar av Canada i 2010. I 2011 var han i beredskap for redningsaksjon i Japan, men den gong blei det ingen tur.
– Vi veit ikkje kva som møter oss anna enn at det er farlege og krevjande terreng å jobba i, både for oss og redningshundane, seier Erik Walden til Midtsiden rett før avreise.