Fann hagle etter aksjon

Klokka 21.42 måndag kveld fekk politiet melding om at det var avfyrt to skot i Hegglandsdalen.

Politiet rykte ut med væpna styrke og hundepatrulje, gjekk til aksjon klokka 22.50 og fekk etter tre timar med forhandlingar mistenkte til å overgje seg og koma ut av bustaden.

Les òg: Overgav seg til politiet

Bustaden blei ransaka og mannen blei i går dimittert etter avhøyr.

– Vi fann ei hagle i bustaden. Mannen har erkjent å ha skote med denne, seier politioverbetjent Audun Hadler-Olsen.

– Men det var aldri snakk om trugslar eller krangling med ein annan part, det var skot ut i lause lufta.

– Spurv med kanon

Sikta seier til Midtsiden at det ikkje var snakk om våpen, og at det berre blei brukt lauskrut.

– Gjenstanden dei tok beslag i er ein antikvitet, det er ikkje noko våpen.

Om gjenstanden blir rekna for å vera våpen vil politiet førebels ikkje kommentera.

– Eg føler dei overreagerer, at dei skyter spurv med kanon når dei går til ein aksjon som denne.

Hadler-Olsen forklarer at politiet har rutine for, når det er snakk om våpen, å rykka tungt ut.

– Det blir sett på som betre å stilla sterkt, og heller ta av mannskap om det ikkje er bruk for dei, enn å koma til ein stad og mangla utstyr eller personell.

– Det er ikkje alltid vi ut frå ei melding veit kva eller kven vi rykker ut til. Det handlar dessutan om tryggleiken til tenestemennene.