Overgav seg til politiet
Etter over to timar med væpna politi rundt huset kom mistenkte ut. Huset er ransaka og mannen skal i dag i avhøyr.
Måndag i 21.50-tida rykte store politistyrker frå Bergen til Os for å bistå etter melding om skyting i Hegglandsdalen.
Væpna politi og hundepatrulje rigga seg klar og omringa i 22.50-tida ein bustad i Dalen.
Det blei oppretta kontakt med mannen, som var åleine i huset, og som på telefon med både politiet og med underteikna (Midtsiden-redaktør Kjetil Bruarøy), hevda at han var uskylig.
Les òg: – Eg føler meg trakassert
Ransaking og avhøyr
– Politiet opprettheldt kontakten og klokka 00.56 kom han frivillug ut av huset, fortel politioverbetjent Audun Hadler-Olsen.
– Han blei tatt med til fengsleg forvaring og skal til avhøyr i dag.
Politiet gjennomførte i natt ei ransaking av bustaden. Dei vil førebels ikkje seia om dei fann våpen.
– Eg vil ikkje kommentera saka yttarlegare før mannen har vore i avhøyr.
Høyrde ingen skot
Midtsiden var på staden frå klokka 22 til 00.30. I denne perioden snakka vi både med mistenkte og med tre av dei nærmaste naboane.
Ingen av dei skal ha høyrd skot i området i går kveld.
Mistenkte var i stova mesteparten av tida, og gjekk blant anna til vindauget og snurra peikefingeren i sirkel ved tinningen, for å visa kva han synest om politiaksjonen.
Han blei i november i fjor dømt for to tilfelle av uaktsam omgang med våpen. Saman med nokre andre forhold gjorde dette til at han blei dømt til 6 månadar fengsel utan vilkår.