Engeline er tilbake!
Søstrene Borghild Strønen og Dagrun Fjellbakk har brukt fem veker på å gje kafeen eit løft – i dag var det opning.
Bildeserie:
Kafé Engeline, som opna i Brugata i mai 2011, har stått stengt den siste månaden. Årsaka er at Havnechefen, som har leigd kafeen og lokalet dei siste to åra, ikkje ville fornya kontrakten. Dei hadde siste opningsdag laurdag 27. februar.
– Vi var ikkje i tvil om vi ville driva vidare i lokalet. Eg har sakna både jobben og kundane, men først ville vi pussa opp, seier Dagrun Fjellbakk.
I fem veker har dei rusta opp alt innvendig, kafeen har fått nytt golv, ny peiskrok, nymalte veggar, nye og nyoppussa møblar og ny disk.
– Det er også gjort ein del tekniske forbetringar, seinare kjem ein del nye maskiner, fortel Borghild.
Til sommaren skal også inngangsparti og terrasse fornyast.
Nye kokkar – ny restaurantsjef
Begge søstrene blir involvert i drifta, men mest med det administrative.
– Eg skal baka og eg skal hjelpa til når det trengs, men eg skal ikkje vera bak disken i same skala som før, fortel Dagrun.
Som restaurantsjef har søstrene hyra Maiken Bahus Heimtoft, som òg jobba der i Engeline si tid. Ho får med seg Lisa Berland til å servera gjestane.
Kokkane er Mailinn Kartveit, som blant anna har erfaring frå Bjørnefjorden Gjestetun, Os sjukeheim og kjøkkenet på Rolls Royce, og Linda Hagen, tilflyttar frå Haugesund som blant anna har jobba 12 år som stuert på båt.
Middag seks dagar i veka
Søstrene frå Strøno legg opp til kafé måndag til laurdag, men med middag på menyen kvar dag.
– Torsdag blir det langope med raspeballar som før, stadfestar Dagrun.
Opningstidene kan bli utvida med tida.
Kulturkafé med kunstutstilling
Trass omfattande oppussing har Engeline halde på den heimekoselege atmosfæra.
Dei nymalte veggane er pryda av kunst av Kristin Elisabeth Haugland. Haugland har tidlegare stilt ut på stadar som Biologen på Herdla, Pygmalion i Bergen og Kulturfabrikken i Mandal.
– Vi blir ein kulturkafé framover med ulike skiftande utstillingar, fortel Borghild Strønen.
Kunsten var på plass på opningsdagen, som dei først såg at dei kom i mål med seint søndag.
– Siste lista blei spikra fast rett før midnatt. Vi kom i mål, og det var godt å få opna igjen.