Ein plass der folk trivst

Torsdag blei det kjend at styret i Oseana Kunst- og kultursenter hadde inngått avtale med ekteparet Mjelstad om drifta av restaurant og serveringsverksemda i kulturhuset.

- Dette blir hyggeleg.

- Vi har tru på at vi skal få til eit godt konsept og ei god løysing her ute, fortel Roald Mjelstad når Midtsiden møter han og kona Anne Rita på Oseana fredag ettermiddag.

God service er nøkkelen

Ekteparet har lang erfaring frå hotell, mat- og serveringsbransjen, mellom anna frå TV 2 sine kantiner i Oslo og Bergen, Hansaparken og Hotell Admiral.

- I tillegg har vi vore mykje ute og reist, både i inn- og utland.

- Då har vi sjølvsagt fått smaka mykje god mat, men når vi har snakka om det i ettertid er det dei plassane kor vi i tillegg har opplevd ei merksam og hyggeleg betjening vi hugsar, smiler dei nye drivarane.

Det vil dei to prøva å få til i Oseana også.

Ønskjer tilbakemelding

Mjelstad fortel at dei sjølvsagt skal servera god mat, men kanskje litt enklare enn dei førre drivarane valde.

- Vi må finna det som passar for osingane.

- Difor er vi audmjuke og takksame for tilbakemeldingar frå gjestane når vi kjem i gang.

- Det er berre på den måten vi kan levera eit godt produkt og bli ein plass kor folk trivst og vil gå.

- Her skal det bli plass til alt frå barnehagar som vil koma på besøk på dagtid, til forretningsfolk som vil ha ein femrettars middag med kundane sine, forklarer Mjelstad medan han beundrar utsikta på den nye arbeidsplassen.

- I pressemeldinga frå Søviknes presenterte han lounge-bar i foajeen. Kva kan du seia om den?

- Dei tankane er heilt i startgropa, men med den fantastiske utsikta som er frå foajeen må det gå an å få til ein bar med salong og sitjegrupper.

- Vegen kjem til medan vi går, men målet er at publikum til Oseana får lyst til å koma litt tidlegare. Ta ein kaffikopp eller noko godt i glaset før dei skal på konsert eller show, og setja seg ned i hyggeleg lag også etter endt framsyning.

Litt tilfeldig

At dei la inn tilbod på drifta av serveringa i Oseana var litt tilfeldig.

- Eg såg annonsa om at dei søkte etter drivarar.

- Då vi avslutta førre restaurantprosjekt, sa vi til kvarandre "aldri meir", men vi snakka om det og tok kontakt med Søviknes.

- Etter å ha vore her ute og sett huset og plassen, snakka med styret og dei som jobbar her på huset, og opplevd den entusiasmen dei har, så fann vi ut at vi ville gje det eit forsøk og legga inn eit tilbod.

Innhaldet i tilbodet vil ikkje Mjelstad fortelja noko om.

- Men at både vi og Oseana skal tena penger er ein klar føresetnad. Skal vi klara det, må vi jobba saman og ikkje sitja på kvar vår tue.

- Treng flinkare folk enn oss

Meir nøyaktig enn at det blir opning i slutten av april vil ikkje dei nye drivarane vera.

- Det heile blei bestemt på onsdag. No gjeld det å finna folk som er flinkare enn oss til både å laga mat og å servera.

- Interessa har allereie vore stor, men det er berre å ta kontakt, smiler Mjelstad.

- Vi har ganske klare formeiningar om kva type folk vi ser etter, og er nok litt kresne.

- Dei må tenka mykje likt som oss når det kjem til kva vi skal tilby gjestane.

- Trivst staben, så trur eg gjestane vil trivast òg, avsluttar Roald Mjelstad, som klør i fingrane etter å koma i gang kulturhuset.