Éin på taket - éin med pil og bue
Politiet rykte ut til mann med pil og bue i Prestegardsskogen, brannvesenet måtte hjelpa ein som i natt sto fast på eit hustak i Os sentrum.
Politiet og brannvesenet i Os var ute på fleire oppdrag torsdag.
På formiddagen sløkte brannvesenet grasbrann i Øyane, på kvelden fekk politiet melding om påkjørt hjort på Ulven.
– I 12-tida fekk vi melding om at det gjekk ein mann rundt i Prestegardsskogen med pil og bue, fortel politibetjent Rune Fimreite.
– Vi rykte ut, men fann ikkje vedkomande. Men vi har fått tips om kven det er.
Kom seg ikkje ned frå taket
Klokka 03.50 natt til fredag fekk brannvesenet melding om mann som sto fast på eit hustak i Os sentrum.
– Han var veldig rusa og kunne knapt gjera greie for kva han heiter, seier Terje Håvardstun frå Os brannvesen.
– Det er uvisst korleis han kom seg opp på taket, men han har truleg tatt seg opp ei takluke frå innsida. Vi fekk han ned luka.
Mannen skal ha fortalt at han prøvde å koma seg inn i eige husvære, men at han ikkje klarte det. Han blei tatt hand om av helsevesenet.