Ein god dagen derpå

I juni blei billettana til Bjørnafjordkonferansen lagde ut, ein ny, regional næringslivskonferanse med foredrag av fleire kjende profilar.

Konferansen fekk undertittelen «Saman om vekst», og arrangørane ville at den skulle vera ein tverrfagleg møteplass for alle som ønskjer å utforske moglegheiter i og rundt Bjørnafjorden.

Ei veke før konferansen kunne arrangørane konstantera at dei hadde nærare 240 påmelde til konferansen, men at dei håpa på å sjå 300-talet til slutt.

I går samla konferansen 270 delegatar i Oseana.

Desse fekk i tillegg til musikk frå Orbo, helsing frå ordførar i Bjørnafjorden kommune, Trine Lindborg, fagleg påfyll og inspirasjon frå kjende profilar som Kari Traa og Ingebrigt Steen Jensen.

God kjensle

Ansvarleg for å hekla det heile saman har vore Marte Kristensen og Christoffer Kobbeltvedt i Fjordfolk AS.

Både Kristensen og Kobbeltvedt ser uforskamma friske og kjappe ut, eit knapt døger etter at det dei har jobba med i månadsvis vart avvikla på éin hektisk arbeidsdag.

– Vi sit att med ei god kjensle i dag, seier Kobbeltvedt. Tilbakemeldingane var gode undervegs i går, og sjølv om dagen var travel, var det aldri teikn til panikk i kulissane.

– Det verste som skjedde, var vel at ein særs engasjert Ingebrigt Steen Jensen snakka seg godt over tida, noko som langt frå kan reknast som eit problem.

Kollega Kristensen deler Kobbeltvedt sine betraktningar om arrangementet;

– I tillegg til gode og kjekke tilbakemeldingar i går, har vi notert oss gode ord i sosiale media, i tillegg til meldingar og e-postar som har tikka inn i dag.

Populær burgar

Siste post i programmet på konferansen var «nettverksburger», kor delegatane var inviterte til å ta ein hamburgar og prata saman i restauranten på Oseana.

Kristensen fortel at 150 av dei 270 delegatane valde å takka ja til dette tilbodet.

– At så mange valde å bli verande for å prata og vera saman, etter at det offisielle programmet var slutt, fortel oss at mange hadde ein kjekk dag i går.

Gode føredrag

– Konferansen starta med eit friskt pust av eit føredrag frå Kari Traa - kva tilbakemeldingar har de fått på dei andre føredragshaldarene?

– Både Jannicke Hilland frå BKK, og Nina Broch Mathisen, direktør i Innovasjon Norge sine føredrag fekk mykje ros for fagleg tyngde, seier Kobbeltvedt.

– I tilegg fekk Ingebrigt Steen Jensen sine betrakningar, ispedd ei solid dose humor, gode reaksjonar frå publikum.

Kristensen fortel at breidde i føredragshaldarene var eit bevisst val.

– Vi hadde som mål om å spesielt nå ut til dei som kanskje ikkje går oftast på konferanse med Bjørnafjordkonferansen. Tilbakemeldingane så langt seier at her var det noko for alle.

Bjørnafjordkonferansen 2.0?

– Vert det ein Bjørnafjordenkonferanse nummer to i 2020?

– Det er ikkje opp til oss å avgjera, svarar Kobbeltvedt, men no skal vi evaluera godt saman med både sponsorar og samarbeidspartnarar, og så får vi sjå kva som skjer.

– Uansett har vi både lyst til, og planverket klart for å gjera dette til ei årleg hending for næringslivet i regionen avsluttar Kristensen.