Duka for storhandel
Gjengen hos Stadion Sport sto på til langt på natt for å få ny og stor butikk klar til opning torsdag morgon.
Bildeserie:
– Det dukkar alltid opp ting når du bygger ein butikk, og då blir det hektisk innspurt, seier innehavar Erik Rosendahl.
Sjølv var han i seng klokka 4 i natt for ein kort blund før opning klokka 8. Andre tilsette sto på frå morgon til rundt midnatt.
– Ryddig og oversikteleg
Stadion Sport har auka frå 310 til 580 kvadratmeter med flytting frå 2. til 1. etasje.
– Behovet for større plass har vore der ei stund, No har vi fått det som vi vil, ryddig, oversikteleg og på ein måte som varene kjem godt fram.
Kundane har vore der sidan opning i dag tidleg og tilbakemeldingane har vore fine.
– Butikken har òg blitt betre for oss som jobbar her, seier butikksjef Maria Steien.
Nye merke og auka bemanning
Butikken har fått fleire nye merke etter flytting, blant anna jakkar frå Patagonia, toppturutstyr frå Dynafit, løpetekstil frå Ron Hill og Lars Monsen sitt undertøy, Aclima.
Med større areal og separat inn- og utgang er behovet for arbeidskraft òg større.
– I den førre butikken gjekk det fint å stå åleine på jobb i rolege periodar, her bør vi nesten vera minst to.
Nokre tilsette har auka i stilling, i tillegg skal det tilsetjast fleire ekstravakter.