Natt til søndag blei ein ungdom frå Os køyrd via legevakt med ambulanse til Haukeland universitetssjukehu etter å ha kollapa på fest.
Sånn opplevde han kvelden.
Nokre få cider blant venar
Guten, som er i slutten av tenåra, var på ein privat fest med rundt 20 gjestar.
– Eg kjenner dei fleste på festen, men ikkje alle, seier guten, som blei skriven ut av sjukehuset og kom heim søndag kveld. Men han føler seg prega av hendinga, og har problem med å innta væske.
Han seier han drakk rundt tre cider og to drinkar før det gjekk gale. Drinkane lagde han sjølv, varene var kjøpt på polet.
– Drinken min var vekke den eine gongen eg var på toalettet, men då lagde eg ein ny. Eg kan ikkje hugsa at andre lagde noko til meg, eller at eg ikkje følgde med. Men det kan godt henda at eg ikkje fekk med meg alt. Eg var blant venar og tenkte ikkje på at eg måtte følga så nøye med drinken min.
Hugsar lite
Minnene er få og stykkevis av det som skjedde seinare på kvelden.
– Eg skulle ned ein etasje, så blei alt svart. Det neste eg hugsar er at eg låg i botnen av ei trapp. Eg var svimmel og kvalm, og synet var tåkete. Eg klarte ikkje å stå eller å gå.
Søsken kom og henta han og køyrde han til legevakt. I forvegen hadde han sjølv ringt 113, men andre på festen skal ha ringt og avbestilt utrykkinga.
– Fråden sto ut av munnen hans då han blei henta, og han var ganske skamslått, truleg etter fallet ned trappa, fortel faren hans.
– Det neste eg hugsar var at eg ba om hjelp på legevavakta, det kjentes ut som om eg ikkje fekk pusta. Eg var visst heilt blå på halsen og det kom skum ut munnen. Så hugsar eg eit lite glimt frå at eg var i sjukebilen, neste minne er frå då eg vakna i ei seng på Haukeland.
Kan ha vore GHB eller GBL
Legane tok blod- og urinprøvar, men ifølgje guten fann dei ingenting.
– Dei sa at eg kan ha fått i meg GHB, det er stoff som er vanskeleg å spora.
For ti år sidan var GHB-misbruk eit omfattande problem i Os. Dei tre første vekene av 2009 var det minst fem overdosar i Os. Men store delar av problemet blei nærmast drege opp med rot, blant anna ved hjelp av samarbeid mellom politi og helsevesen i Os, og ny forskrift i 2010 som sette verkestoffet GBL på narkotikalista.
– Korleis har venane dine som var på same fest reagert på det som skjedde?
– Eg har snakka med nokre av dei. Det er ingen av dei som kjenner til at det var GHB eller andre rusmiddel utanom alkohol på festen.
Etter nøye vurdering, i samråd med foreldra, har guten bestemt seg for å melda forholdet.
– Det er viktig å ta slike ting på alvor, også fordi det er fare for at andre blir utsett for liknande i framtida, seier faren.
Dette skriv rustelefonen.no om GHB:
GHB kan være svært farlig å innta fordi det er liten forskjell mellom en vanlig rusdose, og en dose som kan føre til bevisstløshet, pustestans, og, i ytterste konsekvens, død. I tillegg varierer styrken på GHB-løsningene. Alkohol og andre dempende stoffer forsterker effekten, og dermed også overdosefaren.