Det blir lokaloppgjer!
Os møter Lysekloster i 1. runde i NM. Les korleis klubbane reagerer.
Det er duka for eit durabeleg lokaloppgjer i 1. runde i NM når Os tek imot Lysekloster onsdag 13. april.
Noregs Fotballforbund offentleggjorde fredag kven som skal møtast i 1. runde i cupen.
Publikum som såg at Os slo ut Arna-Bjørnar 8-1 onsdag fekk viljen sin. Alt ligg dermed til rette for fulle tribuner og stor stemning på Kuventræ.
Det blir folkefest
Nyhenda blir motteke med jubel i klubbhuset på Kuventræ.
– Det var ei kjempetrekning. Vi gler oss allereie. Dette blir ein folkefest for heile bygda, så no feirer vi med mjølkesjokolade her på huset, fortel Endre Brenne i Os Turn.
– Dette var drøymemotstandaren for vår del. Det blir ein tøff kamp, men det var dette vi hadde håpa på.
Kjekt for bygda
Manager Thomas Sandal i Lysekloster deler Brenne sin entusiasme i høve til fotballinteresserte osingar.
– Det er kjekt det for lokalbefolkninga.
– Eg fekk nettopp meldinga og har ikkje tenkt så mykje på det. For oss er det serien som er det viktigaste i år, så vi legg ikkje noko meir i det enn at det er ein vanleg fotballkamp. Vi kjem ikkje til Ullevål uansett. Det viktigste for oss, som blir fokus er å halde oss i divisjonen. Men i forhold til fotballinteressen i bygda er det kjempekjekt, seier Sandal.
Her er dei andre "Hordalands-kampane":
Tertnes – Åsane
Fyllingsdalen – Varegg
Sotra – Fana
Vestsiden/Askøy – Nest Sotra
Førde - Brann