Nyttårsfeiringa i Os har, som for eit år sidan, gått av stabelen utan dei store hendingane for brannvesenet.
I 00.25-tida fekk dei melding om brann i bildekk på ein leikeplass i eit nabolag litt utanfor Os sentrum.
– Nokon hadde brukt bildekk til å støtta opp om fyrverkeri, og så hadde dekka byrja å ulma eller brenna. Men branntillaupet blei raskt slått ned, fortel leiar ved brannførebyggande avdeling, Arne Rødberg, frå Bjørnafjorden brann og redning.
Kort tid etterpå fekk brannvesenet melding brann i eit bosspann i Os sentrum.
– Det var snakk om at nokon hadde kasta stjerneskot i bosspannet. Vi svingte nedom sentrum, men då hadde brannen i bosspannet anten blitt sløkt av andre eller brent ut av seg sjølv.
Måndag morgon fekk brannvesenet melding om mogleg steinsprang i Søvikvegen.
– Det var snakk om nokre små steinar. Vi køyrde ut for å sjekka området, men fann ikkje noko som var til hinder for trafikk. Det er mogleg at andre har vore og rydda vekk dei steinane som hadde rast ut.
Andre stadar i bergensområdet har brannvesenet hatt meir å stri med.
I Øygarden har det vore brann i terreng, på Askøy har det vore brann i terreng ved ein terrasse, i Blomsterdalen har ein garasje brent ned og i Alver er ein einebustad totalskadd i brann.