8 smitta på 2 festar: Opplever lite samarbeidsvilje
Kommunen med oppmoding til ungdomen.
Dei to siste dagane har det vore 9 nye smittetilfelle i Bjørnafjorden kommune, 7 av dei er tenåringar, éin er i 20-åra.
– 8 av dei som er smitta den siste veka er knytt til 2 festar, seier assisterande kommuneoverlege Bjørn Petter Aasheim Johannesen.
Dei er alle frå 16 til 20 år gamle.
Johannesen og resten av smittesporingsteamet opplever lite samarbeidsvilje hos fleire av ungdomane.
– Fleire av dei svarer ikkje telefonen, nokre nektar å fortelja kven dei har vore med eller lyg om dette.
– Det skal i tillegg ha åtvara kvarandre mot å ta telefonen når vi ringer.
Karantene og testrutinar
Johannesen seier han forstår at det er ei lite kjekk melding å få, og at folk vil «beskytta» venane sine.
– Men resultatet av manglande samarbeidsvilje er at smittesporinga blir meir krevjande, og risikoen aukar for at ungdom går rundt og smittar andre.
– Dei risikerer også å smitta nokon som ikkje toler covid-19 så bra, ung eller gamal.
Å ikkje samarbeida er dessutan eit lovbrot.
Kommunen håper på betre samarbeid i dagane som kjem, og har denne oppskrifta til ungdomen:
- Hald deg i karantene til du har testa deg
- Test deg 3 til 7 dagar etter at du har vore på festen (det kan ta nokre dagar etter smitta før test gir utslag)
- Ta telefonen når smittesporarane ringer, og svar ærleg
– Mange trur at det er nok å ta ein hurtigtest dagen etter festen - og at alt er i orden om denne er negativ. Slik er det absolutt ikkje. Det tar som regel nokre dagar før viruset slår ut. Difor skal du halda deg i karantene til du tar testen og fram til negativt prøvesvar ligg føre, seier Aasheim Johannesen til kommunen si heimeside.
