5 år sidan start: Søre Neset nærmar seg 170 handballspelarar. Før eigen hall er på plass.

Hausten 2017 starta Søre Neset idrettslag opp med minihandball for førsteklassingar.

På fem år, to av dei gjenom pandemi, har handballgruppa vakse frå 23 i 2010- og 2011-årgangen hausten 2017 til over 150 i barneskulealder i dag.

– I november gjentar vi suksessen med handball også for dei som er siste året i barnehage. Eg meiner vi i fjor fekk inn over 20 i barnehagealder, så det kan godt henda at vi passerer 170 handballspelarar i Søre Neset il til jul, seier trenar Kenneth Husebø.

Dei yngste trener i gymsalen på Lunde barneskule, dei eldste i Oshallen.

Les òg– Heia Søre Neset!

– Det å få trena i kjente omgjevnadar i eige nærområde har nok vore med på å gjera terskelen låg for å byrja med handball.

– At det blir jobba med eigen hall i Halhjemsmarka er jo heilt fantastisk! Då blir vegen endå kortare for mange, og vi får auka kapasitet for denne store gruppa.

Detaljreguleringa gjekk gjennom andregongsbehandling i kommunestyret i juni. I sommar har idrettslaget drive med planlegging og prisinnhenting.

Les ògVil laga lysløype, tursti og badebrygge i Bjørnavatnet

Taco-trøyst blir tradisjon

I fjor haust samla idrettslaget gute- og jentespelarar frå fleire årgangar til ein fredag med både treningssamling og tacomåltid.

– Det hadde vore så mykje styr med korona at vi ville gjera noko ekstra kjekt. Kvelden blei så god at vi fann ut at det var noko vi kunne ta med oss vidare.

Fredag var det treningssamling med taco igjen. Då var 68 jenter og gutar frå 8 til 12 år samla i Oshallen.

Bildeserie:

Full skjerm

1 av 6

– Vi har godt samarbeid med storebror Os Handball, som hjelper oss med ulike arrangement og som vi leigde instruktørar av til denne samlinga. Ungane har godt av å høyra nokre nye stemmer, og få nokre nye øvingar, av og til.

Det var tydeleg at ungane likte både treninga, og det å vera fleire årgangar og begge kjønn saman.

– Eg fekk ei fin tilbakemelding frå han eine; «du, Kenneth, kan vi ha litt mindre handball og litt meir tid til taco neste gong», spurde han.

Godt nivå

Husebø reknar med at det blir fleire «Trening & Taco-kveldar» før jul.

– Då eg spurde etter foreldre som ville bidra til kvelden, var dugnadslista fullsett på ti minutt. Då er det enkelt å laga noko ekstra for spelarane.

Tilsvarande har det vore når trenarar til den aukande mengda spelarar skulle skaffast.

– Mange foreldre har meldt seg, fleire av dei med god handballerfaring, andre er lærevillige og er i gang med instruktørutdanninga si.

– Dei eldste byrjar å nærmar seg ungdomsalderen med stormskritt, gjer dei det godt også sportsleg?

– I juni var vi på Stord Cup for første gong. Der stilte vi med fire årskassar. Vi har mange lag som har gjort det godt i kampar, og vi har mange spelarar som viser stor interesse for å læra meir. Det er det viktigaste.

Den ferskaste handballgruppa i bygda har både jente- og gutelag på fleire alderstrinn, fleire av spelarane er aktive med både fotball og handball.

– Vi synst det er positivt at ungane er aktive med fleire idrettar, og samarbeider godt med fotballgruppa, sånn at treningstidene ikkje krasjar.

– Blir det også eigne ungdomslag i Søre Neset il?

– Nokre av ungane våre skal på ungdomsskule på Nore Neset, andre på Os. Det er naturleg at dei fordeler seg litt på desse litt større idrettslaga når dei kjem så langt.

– Men med god rekruttering i tre idrettslag, og stadig betre fasilitetar, kan det godt henda at vi om nokre år har så store kull at det er grunnlag for ungdomslag hos alle tre. Men det er i så fall eit stykke fram i tid.