Det blir kino

For ein liten månad sidan spurte vi, kva skjer med bygdekinoen når Fjellheim stenger? Fjellheim har dei siste åra vore heilt i Noregstoppen når det gjeld besøkstala til bygdekinoen.

Torsdag kom svaret.

- Eg har gleda av å fortelle at bygdekinoen flyttar inn hos oss, fortel arrangementssjef Berit Steen i Oseana Kunst og Kultursenter.

Steen har i heile vår halde dialogen med bygdekinoen i håp om å få den inn i Oseana. Ei av utfordringane har vore speledag.

- Også dette har løyst seg på ein framifrå måte.

- Bygdekinoen kjem til å visa film i Oseana annankvar sundag, smiler Steen.

Startar i september

Då Midtsiden.no snakka med kommunikasjonssjef Birgitte Langballe i Film & Kino (som driv Bygdekinoane) i mai fortalte ho at reiseruta for hausten ikkje var lagt, mellomanna på grunn av skiftingar i staben, men at dei normalt følgjer skuleåret.

- Vi har fått melding om at dei vil starta opp framsyningane i september, avsluttar ein strålande nøgd arrangementssjef.