– Yes! Vi har oppgradert!
– Vi måtte ha oss ein liten «boost» i dag, sa Tove Tvedt Skarstein då ho inviterte til nyopning av leikebutikken Yes! vi leker, med raud løpar, ballongar og muffins.
Bildeserie:
Sidan juni har dei tilsette ved leikebutikken i sentrum, Yes! Vi leker, jobba på innimellom kundebesøk for å fiksa opp butikken.
– Det har vore litt av eit arbeid der dei har tatt éi hylle om gangen, seier Skarstein.
Ho fortel at dei såg behovet då dei kom til eit punkt der dei følte at varene kom over dei.
Grovskissene for oppgraderinga byrja på Gran Canaria i mars då Skarstein var der med ei venninne som driv med innreiing og interiør.
– Det har vore ein lang prosess og det er Kate Kjærgård som har gjort hovudarbeidet, mens dei andre har hjelpt til.
Butikken har ikkje vore stengt éin dag gjennom heile prosessen og Skarstein skryt av dei fire deltidstilsette på Yes! vi leker.
– Dei har verkeleg stått på heile gjengen.
Like stor - men likevel større
Skarstein fortel at dei tidlegare ikkje har vore så flinke til å profilera seg, men at dette er noko dei skal gjere betre no.
– Vi har tatt oss saman. Det er viktig at vi heile tida arbeidar med korleis det ser ut innvendig og at vi ikkje faller utanfor og blir statiske.
Inne i butikken har dei ominnreidd, blant anna fjerna dei øverste hyllene på seksjonane og fått full utnytting av plassen langs vindauget, noko som gjer at butikken no virkar større.
– Pengane har vi brukt utvendig, der vi har fått gjennomsiktig foliering på vindauga.
– Eg er veldig nøgd, utsida blei flott og det er no mykje lettare å orientera seg inne, så eg håpar det kan vera med på å bringa meir folk i butikken.
Feiringa av nyopninga varar fram til laurdag.