Vurderer asylmottak i Os

I eit brev til rådmann Christian F. Fotland og ordførar Terje Søviknes (Frp) skriv Abri Vekst at dei i samband med at UDI vil lysa ut anbod om ordinære mottak på Doffin vurderer å etablere desentraliserte ordinære asylmottak med opptil 100 til 200 plassar i Os kommune.

– Vertskommunen er eit mottaks viktigaste samarbeidspartner og for mange asylsøkarar den viktigste tenesteytaren. I tråd med våre intensjonar ønskjer vi difor å vera tidleg ute med informasjon og starta ein konstruktiv og kontinuerleg dialog med dykk, heiter det i brevet som mest er ei kartlegging av potensielle bygg som kan fungera for ordinære asylmottak for mellom 10 og 20 personar i kvart bygg.

Ikkje noko konkret

Ordførar Terje Søviknes fortel at administrasjonen har vore i kontakt med Abri Vekst for å finna ut meir om bakgrunnen for brevet og planane.

– Det viser seg at det er eit generelt brev dei har sendt til ei rekkje mellomstore og større kommunar som dei meiner kan vera aktuelle for ei eventuell etablering.

– Dei har ikkje eit konkret opplegg under utvikling i Os, men meiner nok at Os er av ein slik størrelse at eit mottak kan etablerast.

Fekk same svar som UDI

– Rådmannen skulle senda dei eit skriftleg svar fredag eller i går. Der får dei same svar som vi sendte UDI i fjor haust om at vi har scanna gjennom bygningsmassen i kommunen og at vi ikkje kan sjå at det finst bygningar som egnar seg, verken i kommunal eller privat eige, seier Søviknes.

Abri Vekst AS blei etablert i Stavanger i 2015 av Base Gruppen AS. Selskapet er ein aktør innan mottakstenester og kompetanse- og integreringsutvikling for flyktningar og asylsøkarar. Dei driv i dag Forus Transittmottak i Stavanger.