Vogntog og forsøpling
Politiet: For langt vogntog gjennom Hegglandsdalen. Ungdommar laga bråk og forsøpla på Amfi. Laus hund i Mobergsbakkane.
Måndag fekk politiet melding om eit utanlandsk vogntog på veg ut Hegglandsdalen.
– Vogntoget var lengre enn det som er tillatt på strekninga og patrulja rykka ut.
– Den traff på vogntoget ute på Lyssand. Etter litt språkproblem med den utanlandske føraren fekk vi ordna opp i saka, fortel politioverbetjent Terje Sperrevik.
Ungdommar bråka
Politiet har også fått melding om ungdommar som laga bråk og forsøpla på Amfi Os.
– Kundar og butikktilsette reagerte på oppførselen og ba om bistand frå oss.
– Diverre var patrulja oppteken på anna oppdrag, men vi følgjer med på dette slik at det ikkje utviklar seg, forsikrar politioverbetjenten.
"Ulv" i Mobergsbakkane
Ein større hund skal ha blitt observert laus i Mobergsbakkane.
– Den blei beskriven som ein stor hund, og likna litt på ein ulv i følgje meldar.
– Vi høyrde ikkje noko meir om den, så det blei truleg teken hand om av eigar, avsluttar Sperrevik.