Viste musklar i Ayia Napa
Bildeserie frå Kypros: Det einaste som ikkje var perfekt var motstanden, Os vann den eine treningskampen 20-0 (!).
Bildeserie:
I dag reiser A-laget til Os tilbake etter ei vellykka veke på Kypros. Turen gjekk for tredje år på rad til Ayia Napa, ti minutt gåavstand frå sentrum, med gode treningsfasilitetar.
– Forholda har vore perfekte, god bane og dagtemperaturar på 22-23 varmegradar, så gutane fekk sola seg litt og bada mellom treningsøktene, fortelassistenttrenar Ørjan Håland.
– Det einaste som har vist seg å vera litt vanskeleg på denne tida av året er å finna passeleg motstand til treningskampar. No kan det henda at vertskapen undervurderer eit lag frå nivå fire i Noreg, og det skal seiast at vi spelte veldig bra, men 20-0 over sveitsiske FC Steckborn blei i overkant suverent.
Delar av Os-stallen spelte mot Smørås G19 og vann 2-1.
– Om vi skal ned her igjen så blir det nok til at vi prøver å koordinera med ein annan norsk klubb frå tilsvarande nivå, at vi får betre matching.
Hardkøyr i hinder
Sjølv om det nærmar seg andre kvalifiseringsrunde i NM (onsdag 30. mars heime mot Arna-Bjørnar) og seriestart (borte mot Lyngbø laurdag 9. april) har Hassan El Fakiri laga eit fysisk krevjande opplegg i varmen på Kypros.
– Det har vore mykje spurt, spenst og konkurransar, både i småbanespelt og på stor bane.
Os-spelarane reiser heim via overnatting i London og har fri til og med søndag. Så ventar to dagar med trening før andre og siste kvalik-kamp om plass i årets NM.
Oppdaga nye songtalent
Os Fotball har lange tradisjonar for å utfalda seg med mikrofon. Nye spelarar på A-laget blir særleg utfordra på å ta medspelarane og andre hotellgjestar med storm frå scenen.
– Eg har ikkje vore med på liknande nivå som i år. Vi har nok 10-11 spelarar som ikkje har vore på leir med oss før, men desse tok utfordringa på strak arm.
– Christoffer Hafsås viser seg å ha ei kjempegod og silkemjuk stemme, Øystein Takle Eide og Markus Sørås Bjørnevik imponerte òg. Men den som stakk av med førstepremien var Andrew Todd, som ikkje berre kunne synga, han lagde eit heilt show av framføringa si.