Viser dårleg do-vett!
Teknisk drift slit med tette rør: I Kuvågen går det unna med våtserviettar, på Søfteland er det enkelte som stadig kastar vaskeklutar (!) i do.
Det er ikkje OK å kaste tøyklutar og våtserviettar i do. Dyrt blir det òg, skriv Os kommune i ei pressemelding i dag.
Teknisk drift må stadig rykke ut til pumpestasjonar som har stoppa rundt om i kommunen. Pumpene for avløpsvatn stansar dersom det til dømes kjem våtserviettar eller bleier inn i systemet.
Den siste tida har spesielt to område i kommunen hatt hyppige problem med avløpsnettet:
På Søfteland skyl nokon stadig ned tøyvaskeklutar i toalettet. Tøyklutar løyser seg som kjent ikkje opp, og om dei ikkje forårsakar tett toalett hos syndaren der og då, gir dei trøbbel vidare på ferda.
- Du får rekninga
I Kuvågen skapar store mengder våtserviettar og tørkepapir hyppige problem. Kvar gong eit avløpsrøyr går tett, må teknisk drift ut for å bokstaveleg talt løyse opp i problemet.
- Det tar tid å reinse pumpene. Av og til blir dei øydelagde av blokkeringane, og då kostar det mange pengar å erstatte dei. Rekninga fell til sjuande og sist på alle som betaler vass- og kloakkavgift.
– Det er synd at vi må bruke store ressursar på å ordne opp i problem som så enkelt burde vore unngått, seier teknisk sjef i Os kommune, Marianne Kramer.
Dovettregelen er ganske enkel. Berre tre ting skal i do: Bæsj, tiss og dopapir.