Vill, vakker og woke: De To Vitse Menn er tilbake
Har selt nesten hundre billettar på eitt døgn.
– Vill og vakker skriv seg kanskje sjølv inn i tittelen. Woke vil eg ikkje snakka så mykje om, eg skal jo leva i denne bygda ei stund til, seier Jan Helge Corneliussen lett nervøst.
Han og kameraten Thomas «2 meter tulling» Helgesen utgjer komikarduoen De To Vitse Menn, som har selt fullt hus på Oseana fleire gongar.
I går blei to nye show lansert, fredag og laurdag i midten av november, laurdagen med påfølgjande sokkadans i restauranten.
I dag er nesten hundre billettar selte.
– Det var jo pause i fjor haust, så no skal vi oppsummera to år. Vi fekk oss ei god helg med skriving på hyttetur på Tysnes, men har mykje meir å skriva.
– Har det skjedd noko nytt i Os sidan hausten 2022, då?
– Eg veit ikkje, men det har vore litt endring. Sisi fleipa vi med dei nyopna tunellane, no kan vi jo måla effekten. Om vi vil.
– Elles har det vore endring i politisk styre. Endringar generelt er jo bra for oss komikarar, då får vi noko nytt. Etter nokre år med regnbogefargar kan vi no skriva om dei blå igjen.
Mens Helgesen «sit på ei fjellhylle i Odda og skriv», trør Corneliusssen rundt i heimbygda. Den høge tullingen har hatt heilt humorfri, mens Jan Helge i vinter var med på å skriva til vårens Nor og ne-revy.
– Vi skriv året rundt, men ikkje berre om heimbygda og lokalpolitikken. Rundt tre fjerdedelar av showet skal vera forståeleg også for folk frå andre kommunar.
Foreløpig ligg De To Vitse Menn ikkje an til så mykje humorkonkurranse i årets julebordsesong i Oseana, Are Kalvø med «Berre bønder lengtar heim» i slutten av november er einaste til no på haustprogrammet.
