Vil testa klubbkonseptet på Mobergsneset
Jon Hægland tar med seg Grim Moberg, Pål Rønelv, Eirik Krokås til foajeen i Oseana.
Bildeserie:
Komiker Jon Hægland frå Os har med den lokale standupklubben Råkt Opp & Ned tatt kjente og etablerte komikarar, og nokre av dei nye på veg opp, til Os for å halda show på klubbkveld.
Første klubbkveld, i 2012, skapte kø på Catten - sidan har det halde fram med både standup og comedy fight klubb.
– Vi har hatt det veldig fint på Catten, men sånn det har utvikla seg no passar det utmerkt at Oseana kom på banen. Det blir spennande å sjå kva for stemning vi klarer å laga i dei omgjevnadane, seier Hægland.
Han fortel vidare at dei vil halda fram der dei var med klubbkveldane på Catten, der standupkvelden alltid baserer seg på komikarar frå miljøet i Stand up Bergen.
På fredag skal Grim Moberg, Pål Rønelv og Eirik Krokås på scenen. Minst to av desse har stått på scenen i Os før.
• Sjå video av då Grim Moberg deltok i fight club i fjor
Nysatsing for kulturhuset
Oseana har hatt suksess med fleire store humorshow, blant anna med Dagfinn Lyngbø. Samtidig har dei ønskt seg noko i mindre skala.
– Vi har vore på jakt etter ein lettare klubbscene, noko anna enn det vi har i storsalen. Med klubbkonsept og foajeen som scene og bar, blir det lausare snipp, meir som «ein kveld på by'n»,seier Veronica S. Halhjem frå Oseana.
– Det er sett opp to klubbkveldar i haust. Om det blir vellykka så er nok dette noko vi vil halda fram med, seier Jon.