Vil starta eige gym

Denne veka har elevane ved 9. trinn på Søfteland skule prøvd seg i arbeidslivet. Midtsiden har vore heldig og hatt Henrik Mjelva i sving. Mjelva er engasjert medlem i Os Fotoklubb og har både vore på ulike fotooppdrag og i intervju med tre medelevar.

Av: Henrik Mjelva

I dag har vi intervjue 3 ivrige ungdommar frå Søfteland! Jørgen Engelsen i stillinga som dagleg leiar i Os Turn håndball og fotball gruppe. Petter Knudsen som ryddegut hos Actic og Tobias Gade Utne som landmålar hos BKK.

Jørgen Engelsen – parabol og ballspel

Jørgen har vore i jobb med Leif Idar Røen, som er dagleg leiar i Os Turn Håndball og Os Turn Fotball, i tillegg til å driva eige firma med parabolservice.

– Kvifor valte du denne jobben?

– Hovudgrunnen til at eg valte å følgja Leif Idar er vel fordi det er mykje variasjon i arbeidet, innandørs og utandørs, frå rydding til grasklipping. Det er kanskje ikkje så krevjande, men likevel mange utfordringar.

- Korleis trivst du i denne jobben, og korleis er folka du jobbar med?

– Eg trivst veldig godt, mest fordi det er ingen rutinar eller faste arbeidsoppgåver. Der er forskjellig frå dag til dag. Leif Idar er ganske grei, men det er full fart og vanskeleg å halda følgje med han av og til. Mens dagleg leiar i hovudorganisasjonen, Han Parnefält er meir roleg.

– Kva gjer du på når de ikkje er på Kuventræ?

– Då kjører eg rundt med Leif Idar og hjelper til mens han fiksar parabol til folk eller hjelper dei med tv-ane sine.

Petter Knudsen – helsestudio

Petter har vore i jobb på Actic Os, der Sølvi Ann Bahus er sjef.

– Kvifor ville du jobba på helsestudio?

– Fordi eg elskar å trena styrke. Dessverre får eg ikkje trena mens eg er på jobb, men eg skal ha meg ei økt etterpå, seier Petter med eit lurt smil.

– Kva er dine oppgåver når du er her hos Actic?

– Det eg gjør mest no er å rydda opp etter dei som er og trener, vaska utstyret og støvsuga. Eg står også mykje ved datamaskina og registrerer og tar imot folk. Mykje telefonar blir det òg.

– Korleis har du det og korleis er dei du jobbar saman med?

– Eg har det helt greitt, det var ikkje som eg hadde forventa meg, men på ein positiv måte! No berre vaskar eg og snakkar med folka som er og trener. No har eg ikkje tatt noko kurs, så eg har ikkje lov til å instruera. Dei eg jobbar med er svært snille og greie med meg, og dei hjelper meg alltid når eg står fast med noko.

– Du nemnte kurs og instruksjon. Er dette noko du kunne tenkt deg å jobba med?

– Ja, sjølvsagt! Kven vil ikkje ha betalt for å jobba med å trena og motivera andre? Eg kunne godt tenkt meg å jobba med dette - draumen er å starta eige treningssenter, men det ligg langt fram i tid.

Tobias Gade Utne – BKK

Tobias har jobba saman med Thore Andersen i BKK.

– Kva er oppgåvene dine?

– Det har gått mest i data og så har eg vore med ein del ute på oppdrag.

– Det går mest i leidningar og kablar rundt om på busstoppa i bergensområdet. Det ser veldig avansert ut. Men oppgåvene eg får inne på dataen er ikkje så vanskelege.

– BKK er jo ei svær bedrift, korleis har du blitt tatt imot av dei du jobbar med?

– Det er veldig mykje folk som jobbar her, men eg har blitt tatt veldig godt imot.

- Kunne du tenkt deg ein jobb som landmålar?

- Nei, det kunne eg aldri tenkt meg. Det er ikkje nok variasjon til at eg hadde likt meg her over tid.