Vil skapa debatt utanfor Osfest-området

Fredag, ein god time før Vivillain går på scenen som årets første Osfest-band, vi Bergens Tidende fortelja historie og skapa debatt ved inngangen til festivalområdet.

– Vi synest naturlegvis det er kjekt at dei kjem til oss når dei vil laga noko på Os. Eg vil tru at dette blir underhaldande, kanskje kan det òg vera med på å gjera at fleire kjem til festivalområdet tidleg på kvelden, seier festivalsjef Tor Egil Hylland.

BT vil setja Os-ordførar Terje Søviknes (Frp) og Bergen-byråden Rune Bakervik (Ap) opp mot kvarandre.

«Hus, hage og naust til en pris du har råd til. Eller en liten, overpriset altan i 7. etasje og Bybanen til jobb? Å bo i Os og pendle til Bergen kan bli fristende for mange når den nye firefelts motorveien åpner om tre år» skriv dei som emne.

Anna Magnus skal leia debatten, der Søviknes og Bakervik blir spurd, kvar er det best å bu, i «ja-kommunen» Os eller i urbane Bergen?

Men først - eit tilbakeblikk på musikken frå Os

Før debatten kjem kulturjournalist Kjetil Ullebø og musikkmeldar Einar «Engelen» Engelstad for å fortelja Os si rockehistorie på 15 minutt. Og for å drøfta kvifor to frå Os er blant dei fremste eksponentane for «Bergensbølgen».

– For å fortelja rockehistoria til Os grundig treng du nok både ei bok og ein osing, men vi vil prøva å ramsa opp det viktigaste på ein underhaldande måte, på kort tid, seier Engelen til Midtsiden.

– Kor langt tilbake i historia vil de gå?

– Det blir vel frå tida med striledansane, gjennom pønkperioden til rock, svartmetall og fram til dagens Aurora.

– Det heile blir jo frå ein «by-gensar» sitt perspektiv. Å vera musikar frå Os kan vera ein fordel, men òg eit problem, vegen blir gjerne litt lengre frå Os til Bergen enn motsett. Det kan vera lett å ta turen til by'n og prøva seg på ein scene, men ikkje like lett å lokka bergensarar til Os for å lytta, eller å få merksemd i Bergen om du kjem frå Os. Eg kunne for eksempel ikkje finna eitt ord om Mighty Magnolias i BT, men dei fekk terningkast 5 i Dagbladet.

– Som gamal raddis syntest eg i si tid at det var overraskande å sjå at ingen gamle Os-pønkarar hadde motforestilling då Frp, eit parti som i praksis ikkje hadde ein kulturpolitikk, skulle styra kommunen. Fram til i dag har eg ikkje høyrd ein einaste musikar frå Os som har klaga heller. Det fortel om gode arbeidsvilkår i bygda.

• Midtsiden samleside: Osfest