Vil løfte jentefotballen vidare

Jentefotballdagen, som blei arrangert på Kuventræ laurdag 27. april, blei ein stor sukess med omlag 250 jenter frå dei sju klubbane i Os.

– Stig Blindheim i kretsen hadde lyst til å møte trenarar, lagleiarar og foreldre i samband med dagen, men vi måtte seie nei, då vi trengde alle gode krefter til å dra arrangementet i land.

– I staden inviterer vi alle med interesse for jentefotballen til eit møte med Stig og Magnus Johansson frå kretsen i klubbhuset på Kuventræ torsdag, fortel koordinator for jentefotballdagen, Eirik André Hesthamar.

Organisering og fagleg påfyll

Tema for møte vil vera erfaringar frå jentefotballdagen 2013, kretsen si satsing på jentefotball, korleis legga til rette for god fotballaktivitet i jentefotballen og planane omkring eigen jenteserie i Os og Fusa.

– Eg håpar det skal bli ein kjekk kveld, kor vi får noko fagleg påfyll frå Magnus Johansson, og kan drøfta kva vi kan gjera for å få fotball til å bli enno meir attraktivt for jenter.

Vil ha med seg Fusa

Til møtet er også laga på andre sida av fjorden invitert. Hesthamar trur potensialet i Fusa er like stort som på Os.

– Eit av temaene vi vil lufta er om det er ein god ide å laga eigen jenteserie for Os og Fusa etter same modell som er på gutesida.

– I dag organiserer Os Turn serien for gutane i alder 6 til 12 år i området, medan det er Åsane som gjer det på jentesida.

– Vi har fått eindel tilbakemeldingar frå foreldre som tykkjer det er langt å skulle køyre jentene på kamp i Åsane, Austevoll eller Sotra.

– Kanskje kan vi få kretsen med på å få organisera ein lokal serie. Dei har så langt stilt seg positive til initiativet, fortel Hesthamar.

Styrer unna Vårspretten

Datoen for jentefotballdagen 2014 er allereie satt.

– Vi siktar oss inn på laurdag 26. april 2014.

– I fjor kolliderte vi med handballturneringa Vårspretten. Det vil vi freiste å unngå i år. Det er berre bra om jentene driv fleire idrettar.

– Difor har vi vore i kontakt med Svein Myklebust hjå Bjørnar, som arrangerer turneringa, for å sjå om vi kan unngå kollisjonen til neste år.

– Han har vore utruleg trivelig og samarbeidsvillig. Saman har vi kome fram til at vi arrangerar jentefotballdagen laurdagen, så set Bjørnar opp kampane for handballjentene sundagen, avsluttar Eirik André Hesthamar.