Vil kosta 820 000
Skulane ønskjer ei oppgradering av det audiovisuelle utstyret. No har administrasjonen presentert behovet og kostnaden på totalt 820 000 kroner.
Politikarane nyttar sjølv både Ipad og moderne projektorar når dei fattar sine politiske vedtak. På skulane rundt i bygda er det meir så som så med utstyret.
– Vi har bygd oss opp over fleire år når det gjeld slik utstyr, men framleis manglar det i eindel klasse- og møterom, fortalde Knut Vidar Garlid, IT-ansvarleg på Oppvekst- og kulturavdelinga, i tenesteutvalet førre veke.
Ein sjølvsagt del av klasserommet
AV-utstyret har blitt ein naturleg og sjølvsagt del av klasserommet. Ut har dei gamle overhead-prosjektorane, kor det var umogleg å leggje lysarket rett veg, gått og inn har meir moderne løysingar kome.
– Med AV-utstyr meiner vi prosjektor med lerrett og høgtaler, digital talve med høgtalar eller for gruppe-/møterom ein stor TV-skjerm med lydløysing.
– Mange av skulane ønskjer seg digitale tavler (Smartbords). Desse er relativt kostbare, men byttar vi ut prosjektorar med Smartboard, så kan vi nytta desse i andre rom, forklarte Garlid.
Slik er stoda
I undersøkinga har administrasjonen sett på stoda på kvar einskild skule.
– AV-utstyr til den nye ungdomsskulen på Nore Neset er ikkje med i oversikta, då dette kjem med i byggjerekneskapen.
Oversikta (sjå bilete til høgre) syner at ein manglar 18 digitale tavler, 14 prosjektorsett og 9 TV-skjermar.
– Om vi konsenterar oss om dei klasse- og møteromma som manglar slik utstyr og utstyrer dei med eit prosjektorsett vil kostnanden vera 820 000 kroner, fortalde Garlid.
Tenesteutvalet tok ikkje stilling til saka, men ba om at den blei teken med til budsjettkonferansen 5. og 6. november.