Vil ha sommar-SFO i Lysefjorden

I tenesteutvalet onsdag i førre veke spurde Susanne Sperrevik (H) om administrasjonen hadde vurdert å opa sommaropen SFO ved Lysekloster skule.

– Eg har fått henvendelsar frå foreldre ved Lysekloster skule som har etterlyst sommarope SFO. Spesielt gjeld det dei som skal byrja på skulen hausten 2016. Det ser ut til at det blir to førsteklasser frå hausten og eg kan forstå at dei ikkje har lyst til å senda borna til Kuventræ i sommar.

– Kan det bli ope SFO ved Lysekloster om mange nok ønskjer det? Har de planlagt ein spørreundersøking blant foreldra, lurte Sperrevik.

Ikkje i år

Fagleiar for skule, Per Olav Sørås gav ikkje Lysekloster-foreldra mykje håp.

– Eg forstår spørsmålet. SFO som tema kjem opp med jamne mellomrom. Spesielt opningstider og ferie er ei utfordring.

– Til spørsmålet ditt, så er det klart der mogleg. Lysekloster skule ligg litt spesielt til. Men det betingar at det er nok born og at vi har folk som kan jobba der. Kuventræ har hatt sommarope SFO i mange år. Sjølv om det har vore 56 til 58 born som har vore aktuelle, så har det ikkje vore meir enn 7-8 som har nytta tilbodet. Eg må høyre med rektor og SFO-leiar om det er mogleg.

– Ein annan ting er at det må gå til sjølvkost. Vi har ikkje budsjett for ei utviding, forklarte Sørås.

Oppdatert: Rektor vil sjå på saken

I etterkant av møtet i førre veke har Sperrevik vore i kontakt med rektor Ole Lars Strønen ved Lysekloster skule.

– Han fortalde at om det er nok born som vil ha SFO i sommar, så skulle han klare å få det til. På eige initiativ vil han sende ut ei spørjeundersøking til aktuelle familiar, opplyser Sperrevik.

Set ned prosjektgruppe

Sørås fortalde vidare at skulekontoret nettopp har satt ned ei prosjektgruppe som skal sjå på SFO-ordninga og vedtektene for SFO.

– Sist det var oppe var for 5-6 år sidan, så det er på tide å sjå på det på nytt. Ferieopning vil vera ein del av dette arbeidet. Resultata vil vi leggje fram for tenesteutvalet på møtet i april.

– Noko av det som er krevande med å ha sommerope SFO er bemanninga. Også dei som jobbar der skal ha ferie.

– Vi har diskutert det. I Os kommune betalar ein for 10 månader med SFO og ekstra for ferien. Andre kommunar har 11 månader inklusive ferien. Dette er noko prosjektgruppa skal sjå på.

Kommunalsjef for oppvekst og kultur, Line Rye supplerte med at dei oppdaterte vedtektene ville komma til politisk handsaming.

– Dei politiske vedtaka klarar vi ikkje få effekt av allereie til sommaren. Det ligg utfordringar i høve arbeidsavtalar for den enkelte. Difor må vi ha ein dialog med tillitsvalde og den einskilde. Det er fleire aspekt med ei slik omlegging, men vi er veldig opptatt av brukarperspektivet, kommenterte Rye, som òg fortalte at ei brukarundersøkning ville komma til dei som har barn i SFO i dag.