Vil ha meir fortau

Os kommune la rett før helga reguleringsplanen for Osstølen (Sveo) ut til offentleg ettersyn. Planområdet omfattar 153 dekar mellom Utgjerdet og Prestegardsskogen med 152 bustader i ulik storleik og prisklasse.

Då Plan- og bygningsutvalet handsama saka på møtet i desember fekk arkitekten ros for dei endringar som var gjort sidan utvalet hadde saka oppe i samband med igangsetjinga av planarbeidet.

- Eg vil gje ros til arkitekten og planavdelinga for arbeidet som har vore gjort sidan sist vi var på befaring i området.

- Denne planen gjev ei heilt anna utnytting enn det som ligg i gjeldande plan for området, og dei tinga vi hadde innspel på sist har dei teke hensyn til, meinte Gustav Bahus (Frp) som var nøgd med at dei 11 etasjers blokkene som sist blei presentert no er fjerna.

Samrøystes fortauskrav

Om ikkje planutvalet var einige i alle grepa arkitekten hadde tatt, var dei i allefall samrøystes i ein ting. Meir fortau.

- Eg vil anbefala til neste gong at ein tek med seg at det skal leggjast fortau langs alle vegane i planen. Er det anna grunn enn antal bueiningar som er grunn til ikkje å ha fortau, undra Bahus.

Arealplanleggjaren måtte innrømma at det var det ikkje.

- Er det nokre plassar kor det er vanskeleg eller uhensiktsmessig å laga fortau då? undra Sonja Vernøy Hansen (Frp).

Det klarte ikkje planleggjaren å svara på på ståande fot.

- Då foreslår eg at vi tek inn eit kulepunkt om fortau, fremja Harald Døsen (Ap).

Meir parkering

Nord i området mot Prestegardsskogen hadde arkitekten teikna inn ei offentleg parkering som utgangspunkt for bruk av Osmarka.

- Det ser eg veldig positivt på, men eg kunne tenkje meg å utvida feltet til 16 plassar i staden for 8 for å gjera Osmarka enno meir tilgjengeleg, foreslo Døsen.

Også på det punktet fekk han full tilslutning frå dei andre medlemmane i utvalet.

Frist for å koma med uttale til reguleringsplanen er 23. februar.