Vil ha færre hemmelegheiter og ordna former

Ordførar Terje Søviknes si dobbeltstemme sikra torsdag Osfest eit kommunalt tilskot på kr 500.000. Opposisjonen låg langt lågare i kronebeløp i sine opprinnelege framlegg, og Nils-Anders Nøttseter (MDG) kunne tenkt seg eit meir «gjennomsiktig rekneskap» frå Osfest, og ordna former for tildeleing av tilskot.

Saknar kulturkontoret

Nøttseter stilte seg undrande til kvifor kulturkontoret ikkje har vore direkte inne for å behandla søknaden om tilskot.

– Dette er det største omsøkte kulturbidraget, likevel ligg der ingen uttale frå kulturkontoret og kultursjefen i denne saka.

Både Eirik André Hesthamar (Frp) og Marie Bruarøy (H), meinte Osfest er eit viktig arrangement som det er viktig å støtta. Bruarøy såg også noko fram i tid, og meinte at festivalen kan bli viktig reiselivsmessig når Osøyro og gjestehamna er ferdig opprusta.

– Vi kan gjerne også senda eit signal til festivalleiinga om at dei må rusta seg for å stå på eigne bein etterkvart, sa Bruarøy.

Konsulenthonorar

Nøttseter uttrykte at han var litt betenkt med omsyn til den framlagde rekneskapen frå Osfest 2015.

– Eg har rekna gjennom mange gonger, og eg kjem fram til eit overskot på 600.000, fordi inntektene er 6,6 millionar og utgiftene 6 millionar kroner. Og Osfest fekk eit stort tilskot alt i fjor. Dessutan stussar eg over ein post i rekneskapen som er kalla konsulenthonorar og rådgjeving - ein post som utgjer 700.000 kroner, meir enn ti prosent av rekneskapen. Kvar er desse pengane gått? Dei er ikkje artisthonorar.

–Eg er for at folk skal få betalt for å jobba med kultur og kunst, men ikkje viss det skal vera hemmeleg. Det er sagt at Osfest er eit gigantisk dugnadsprosjekt,der det ikkje vert teke ut løn, og det er flott, med eg kunne godt tenkt meg å få avklart dette konsulenthonoraret, og vore sikker på at det ikkje er nokon skjulte lønskostnader. Her er meir eg ynskjer innsyn i, sa Nøttseter.

Ordna former

Nøttseter tykkjer det er flott at Osfest siktar mot å verta eit verkeleg stort arrangement.

– Styret for festivalen viser ein sterk vekstambisjon som kommunen skal bera ein stor del av kostnaden med. Det synest eg ikkje er greitt. I mitt framlegg til vedtak vil eg be Osfest om at dei søkjer KUP-midlar denne våren for festivalen 2017. Alle desse kulturtilskota må sjåast i samanheng. Dette er ikkje eit eingongstilfelle, og tilskotet må inn i ordna former.

Tone Hespsøe (Ap) sa seg einig med Nøttseter.

– Vi har fire saker om kultur og idrett i dag. Desse må sjåast i samanheng. Vi vil støtta Osfest, men dei konkurrerer med andre arrangement. Skal vi kunne hoppa på ting undervegs, må vi vera selektive med kva vi løyver til Osfest.

Ringverknader

Jon Sivert Rykkel (V) kunne godt ønska seg at Osfest vart ein arena også for lokale musikarar.

– Osfest har klart å skapa eit stort arrangement. Hadde det vore ein tanke å videreutvikle konseptet, og verkeleg få ein folkefest der det sydar av liv på Øyro. Hadde det vore mogleg å la lokale artister visa seg i større grad? La unge få ein plattform? Frå kommunen si side: fremme egen lokal kultur.

–Men eg er skeptisk til dei høge summane. Festivalen må byggjast over tid. Dersom dei får for store bidrag kan det verta ei sovepute. Ein kan ikkje begynne for stort, å trappe opp på sikt må vera bedre.

Møte med festivalleiinga

Ordføraren meinte at ein gjerne kunne drøfta både profil og innhald, og gjerne få avklar alle spørsmål ein måtte ha. Men han sa at det måtte bli på eit seinare tidspunkt, og at det ikkje kunne gjera noko frå eller til med omsyn til saka dei skulle handsama.

– Skal ein driva ein festival av ein viss storleik, sjå til Tysnesfest til dømes, er eg einig i at det må vera tydeleg og offentleg for all bidragsytarar kvar pengane blir brukt.

– Slik eg oppfattar det ønsker formannskapet ei orientering og dialog med festivalstyret, så då vil vi invitera dei inn på eit møte på eit seinare tidspunkt.

Midtsiden har ikkje fått styreleiar i Osfest, Tor Egil Hylland, i tale om rekneskapsforvirringa, men Osfestleiinga har opplyst at dei ikkje ynskjer å kommentera tilskotet frå kommunen.