Vil du kjøra større båt?

Då krav om båtførarprøve kom 1. mai 2010 gjorde Bjoarvik Trafikkskole ei utviding av kursprogrammet til også å innehalda ein maritim del.

Båtførarprøven er ei teoretisk opplæring og eit krav til alle som er fødd 1. januar 1980 eller seinare og vil føra båt på over 8 meter eller båt med meir enn 25 hestekrefter.

– Det har vore stor interesse for desse kurs, fleire hundre har tatt båtførarprøven hos oss desse tre åra, seier Arne Bjoarvik.

Fekk fagfolk med

Med seg har han Tom Olsen frå Bergen Sjøskole. Olsen har nærmare 30 år fartstid på sjøen, blant anna for Sjøforsvaret, på ferje, hurtigbåtar, supplybåt og cruiseskip.

Han har segla som skipsførar i over 20 år, kjørt kurs i Noreg inkludert Svalbard, på Kanariøyene og i segling i greske farvatn.

I tillegg til at han er utdanna sjøkaptein er han også utdanna adjunkt og har undervist ved Bergen Maritime vgs.

– Mange meinte eg kunne ta kurs og kjøra bårførar-undervisinga sjølv, men det er bil og vegtrafikk vi i Bjoarvik er gode på. Eg meiner du skal kunna mykje meir enn det du lærer frå deg, når du driv med undervising, og ville ha med nokon med fartstid. Det er mykje lettare for dei med lang erfaring å kjøra god undervising for båtfolk, seier Arne, og er glad han fekk sambygdingen Tom med på laget.

Bergen Sjøskole er godkjent testsenter og Olsen si avdeling hos Bjoarvik har gjort at osingane kan ta eksamen i kurslokala deira i Jordmorsvingen i Os sentrum.

Utvidar med fritidsskipper-kurs

Bjoarvik held fram med båtførar-undervising i samarbeid med Olsen frå Bergen Sjøskole, men utvider no også med VHF-kurs og eit meir omfattande kurs.

– I løpet av våren set vi opp kurs for dei som vil ta fritidsbåtskippersertifikat (D5L). Med dette sertifikatet kan du kjøra båt som er over 15 meter lang (inntil 24 meter), fortel Olsen.

Fritidsskipper blir også brukt i næringsverksemd, for dei som fører båtar som gjerne er mindre enn 15 meter, men som har inntil 12 passasjerar.

– Eg har vore nordover nokre gongar og halde kurs for verksemder som tilbyr fjordsafari med RIB.

Også for andre

Sertifikatet kan seinare byggast på med tilleggskurs som gjev utvida fartsområde til "World wide".

– Har du ein seglbåt på over 15 meter du vil farta nedover Europa med kan det vera greit å ha papira i orden.

Bjoarvik og Olsen er spent på responsen for skipperkurs i Os.

– Kapasiteten er god, vi har plass til rundt 20. Kurset er omfattande så vi treng 10 eller fleire deltakarar for at vi kjører det, seier Arne Bjoarvik.

– Eg har sett at det også er fleire erfarne båtfolk med båtar på oppunder 15 meter, folk med båtar å 30-40 fot som liker å reisa på tur, som tar sertifikatet for å bli flinkare på sjøen. Det er kjekt å sjå slike haldningar, seier Tom Olsen.