– Vil du ha ein stein til 130.000?
Skjerpa tryggleik, tøff design og tunge diamantar pregar nye Gullsmed Eide på AMFI Os.
Bildeserie:
Torsdag klokka 12 var det nyopning hos Gullsmed Eide, som har flytta til nytt lokale nokre meter frå det førre, i AMFI Os.
– Det blei ein ekstremt hektisk innspurt, butikken var ferdig klokka 11.50, og nokre av utstillingane vil vi bygga om og fylla på seinare, fortel innehavar Johan Eide.
– Og du skulle vore her tidlegare i dag, då vi testa røykmaskina til alarmanlegget, seier han.
Gullsmeden har tryggleiksklasse nivå 3, same som bankane har, med rikeleg med sensorar og sterke sperrer, både som skal på butikken og rundt gullavdelinga inne i lokalet.
– Om alarmen blir utløyst blir det pumpa ut så tjukk røyk at du ikkje ser handa di. Det skal bremsa og hindra dei som eventuelt tar seg inn i butikken utanom opningstida.
Lekker dansk design
Men Gullsmed Eide er først og fremst for dei som kjem i opningstida, og det er i tillegg til tryggleik lagt vekt på design og god framstilling av utvalet.
– Vi har det siste innan gullsmed-innreiing, med kontrastar mellom svart og kvitt, og dansk designa golv med rekve-look.
Eide er spesielt stolt over klokkeveggen.
– Vi har fleire nye merke innan både klokker og smykke, og merkene er betre sortert og meir ryddig framstilt no.
Sel diamantringar til over 100.000 kroner
Saman med dei tilsette hadde Eide i dag diamant-leverandør Håkon på besøk på opningsdagen.
Leverandøren vil av tryggleiksårsaker ikkje ha fullt namn i avisa.
– Det er varer i høg prisklasse eg reiser rundt med, seier han.
Fleire av ringane i utvalet har prislapp på over 100.000 kroner.
– Denne er på rett over 1,5 karat og kostar 130.000 kroner, fortel Håkon, og forklarer at det er fire faktorar som bestemmer pris på diamantar; carat (vekt), colour, clearness og cut.
– Og desse kostbare ringane er noko folk kjøper?
– Ja. Det vi sel nok over 100 sånne ringar i året, seier Håkon.