Vil bygga ny nattklubb

Bildeserie:

Full skjerm

1 av 1

Opus Café & Bar blir verande på Oshjørnet i minst eit år til, men eigaren er førebudd på å bygga ein ny nattklubb, og ser etter nytt lokale.

- Eg sit med ferdige teikningar på full ombygging av Opus i eksisterande lokale, men sidan eg ikkje kan bli verande her meir enn eitt til to år til, ventar eg til eg finn nytt lokale, seier Espen Risti til Midtsiden.no.

Millioninvestering
Risti vil bygga ein ny nattklubb i Os. No ser han etter eit lokale på rundt 200 kvadratmeter, noko større enn dei 160 gjestane hans har å boltra seg på i dag, men viktigast, med ny, moderne innreiing.

- Kor mykje er du førebudd på å bruka på ei slik investering?

- 2. juledag stenger vi på Champions i Bergen, for å bygga om for 2,5 millionar kroner og opna som SIN (Social Intelligent Nightclub) 5. februar. I Os trur eg at eg kjem langt for mellom 1 og 1,5 millionar kroner.

- Er det marknadsgrunnlag i Os for slike investeringar?

- Ja, det trur eg. I 2008 gjekk vi med 280.000 kroner i overskot. Litt lågare omsetnad og ein del høgare utgifter i år gjer at vi landar på rundt null i 2009.

- Men det opplegget eg har planar om trur eg kjem til å slå godt an i Os. Det er potensiale for å få endå fleire til å gå ut i helgene, seier Risti.

Må flytta
Fondet BB Eiendom Invest I, som eig Oshjørnet, går med planar om opprusting og utviding av bygningen.

- Vi ønskjer å auka butikkarealet og bygga på i høgda med 9 nye sjølveigande husvære. I dag har vi 10 husvære. Vi vil ta vekk to på loftet slik at vi står igjen med 17 husvære frå 60 til 120 kvadratmeter, seier fondsforvaltar Terje Haugan frå Bergen Eiendomsforvaltning AS.

I Opus sitt lokale ser han for seg at det framleis blir kafé, og gjerne nye butikkar, men nattklubb meiner han passar mindre bra.

- Men vi må ha nattklubbar i sentrum! Vi vil sjå på løysingar for Opus i andre eigedomar vi har i Os, men om Risti ordnar seg på andre måtar er på glade på hans vegne, seier Haugan.

Is i magen
Kva type lokale og kva bygning i Os han ønskjer å flytta til vil Risti førebels ikkje seia noko om.

- Er det viktig at lokalet er i sentrum?

- Det veit eg ikkje. Det er ein del attraktive bygningar rundt sentrum, så det kan vera mykje som er av interesse.

- Men førebels har eg is i magen, det er lett å driva på ein grei nok måte der vi held til no, seier Espen Risti.