Vil bli verande i Os
I dag tidleg vanka det kaffi, kakao og valentins-sjokoladar til osingane på busstasjonen – banken vil visa at dei er her.
Bildeserie:
Benedikte Toftesund, avdelingsbanksjef for Sparebanken Vest på Os, og to av hennar medarbeidarar, stod frå klokka sju i dag tidleg på busstasjonen på Osøyro.
– Alle kontora i Bergensregionen har gjort dette i dag, og delt ut kaffi og kakao med noko attåt til andre som har vore tidleg oppe og ute i kulden. Målet er å gje folk ein god start på dagen, seier Toftesund.
– Vi vart veldig godt mottekne, men det var ikkje så mange som var der. Det vart litt kaldt etterkvart, og utan nokon å dela ut kaffi til, pakka vi saman litt før vi hadde tenkt.
Auka pågang
Etter nyheita om at DNB legg med sin bankfilial på Osøyro, har Sparebanken Vest merka ei auke i talet på kundar.
– Men det har vore mange spørsmål om vi kjem til å leggja ned også. Men her er vi, og her vil vi vera. Det er ingen planar om å leggja ned avdelinga vår på Os med det første.
– Os er eit regionalt finanssentrum, i ein kommune i vekst. Eg kan ikkje skjønna anna enn at det må vera utviklingsmoglegheiter også for oss, særleg etter at den nye vegen kjem.
Sel det same
– Bankane sel stort sett dei same produkta. Det blir omlag som å samanlikna Tine melk og Q-melk. Det som skil oss er måten vi treff kundane på.
- Kvardagsbank-tenestene våre tek folk seg stort sett av sjølve via nettbank. Men rådgjevingstenesta er noko dei fleste gjerne vil få bruk for i fasar av livet.Til dømes når ein skal etablera seg. Vi ynskjer å vera ein god sparring-partnar for kundane våre, avsluttar banksjefen.