VIDEO: 17. mai på Kyrkjeflaten
Sjå delar av talane og dei musikalske innslaga under 17. maifeiringa i Os sentrum søndag.
Bildeserie:
Det blei ein prosesjon og ei feiring i vekslande vêr, men av stabil kvalitet i Os sentrum i går.
Sjå òg:
• Bildeserie frå toget
• Russen i toget
• Dei finaste og tøffaste paraplyane
Os skulekorps og Os Musikkforening sto for musikken i toget, og Os Musikkforening heldt stand gjennom den dryge timen i parken ved kyrkja for å gje oss nasjonalsongen, Ossongen og Fagert er landet.
Tema: Lykke
Først ut var 1. og 2. klassetrinn ved Kuventræ barneskule, som song fleire låtar og runda av med Ossongen, så kom dagens hovudtalarar med vokalist Eirin Røykenes som backing.
Ord for dagen var ved 7. klassingar frå Kuventræ, som blant anna snakka om mangfald. Skulen har elevar frå 28 nasjonar, alle blei ramsa opp. Ein av elevane spelte også «Kom mai du skjønne milde» på blokkfløyte. Ein smule imponerande.
Tema for hovudtalen var, 70 år etter at andre verdskrig var over, knytt til fridom og handla om lykke.
Jon Bendik Melhuus og Bergitte Bogevik fortalte om kva som gjer dei lykkelege, om reiser, god mat, gode kollegaer, om dyr og natur.
Åleine om lykka di
Så var det tid for innslag av elevar med lengre musikalsk fartstid. Selma Fosså Bunæs, Torbjørn Sandmo og Jone Finne Kuven framførte «Du er åleine menneskje, om lukka di».
Låta er skriven av multikunstnaren Bernt Kristiansen, osingen som i fjor blei heidra med ein skulptur. Også då blei låta framført av dei tre talentfulle ungdomane. Låta er tonesett av Eli og Stein Inge Brækhus.
Så kom Spelemannslaget med ein springdans og ein vals før russepresidentale talte og Eirik Søfteland saman med Olav Skorpen fekk siste ord.
– Eg hadde planlagt nokre dårlege vitsar om regnet, men no har det jo letta, sa bunadskledde Eirik før han fekk heile Kyrkjeflaten opp i humør med «Grevling i taket».
På siste låt, «Månemannen», fekk han både Spelemannslaget og Fonos med seg.