– Vi vil ha dei i reserve

I går kom ein trailer og henta fleire store maskiner frå lefsefabrikken på Bø. Dette trass i at Rieber lenge har sagt at produksjonen går for full på Lierne Bakeri i Trøndelag.

Les òg: Her blir lefsefabrikken tømt

Tidlegare tillitsvalt ved fabrikken, Stian Kyte, meiner dette viser at Lierne slit med å kopiera Os-produktet Vestlandslefsa.

Det blir avvist av Rieber & Søn.

– Då vi tok endeleg avgjerd om flytting så bestemte vi oss også for å selja lokalet, så no skal lokalet tømmast, seier kommunikasjonsrådgjevar Geir Holen.

– Men sjåføren sa han skulle til Trøndelag med maskinene, stemmer ikkje det?

– Nokre maskiner blir kasta, nokre blir flytta til andre fabrikkar som produserer heilt andre ting enn lefser - og nokre produkt skal til Lierne som reserve.

– Så de skal ikkje kopiera produksjonslinja frå Os?

– Nei. Nokre få maskiner frå Os er allereie i bruk på Lierne, men dei henta vi tidlegare, seier Holen, utan å seia kor tid dei blei henta.

– Den same gamle

På spørsmål om leveringsproblem seier Holen at dette er grunna ein kortare periode med litt for låg produksjon.

– No står vi på for å koma ajour, produksjonen går for fullt, natt og dag.

– Om rundt tre veker skal vi vera i rute. Vi har også kjørt mange smakstestar og blindtestar, det er den same gamle gode Vestlandslefsa som no blir produsert og levert frå Lierne, seier Geir Holen.

Håp om Orkla-vending?

Tidlegare lefsebakarar frå Os går framleis med eit lite håp om snuoperasjon av Orkla, som nyleg kjøpte Rieber & Søn.

– Eg kan ikkje uttala med på vegne av Orkla. No skal handelen først godkjennast av konkurransetilsyn og vi ventar ikkje svar før første kvartal 2013.

– Fram til då driv vi vidare som før, kvar for oss, seier Holen.