-Vi skal klare det!

Det var ein entusiastisk gjeng foreldre og skaterar som inviterte til pressekonferanse på Søre Neset fredag for å presentere «Switch Halhjem Skatepark».

På dugnad har den ivrige gjengen opparbeidd ei tomt mellom skulen og fotballbanen for å gjere den klar for street-skating. No frir dei til næringsliv og andre for å kome i mål med prosjektet.

- Totalbudsjettet er på omlag 780 000 kroner, fortel initiativtakar Bjørn Madsen.

20 000 frå Lions

445 000 kroner har dei allereie i boks gjennom dugnad, tippemidlar, frifond-midlar og gåve frå Lions, men framleis mangler dei 335 500 kroner for å kome i mål.

- Vi sparka igang skateparken på Kuventræ. No vil vi bidra til å realisere det store prosjektet de har starta opp her, sa Franzie Lerch frå Lionsclub Os då ho overrakte gåvebrevet på 20 000 kroner.

Samstundes oppfordra ho tilsvarande organisasjoner og næringslivet til å bidra med støtte slik at prosjektet blir ein realitet.

Ungdommen aktivt med

Det heile starta med at ei foreldregruppe ønska å skape eit miljø på Halhjem også for uorganisert ungdom.

- Vi hadde med oss ungdommane på Fysak i Bergen og lot dei fortelje kva dei ønska seg. Konklusjonen blei at eit street anlegg sto høgst på ønskelista, fortel Bjørn Madsen.

Saman med idrettslaget gjekk dei til kommunen og fekk hjelp til å finne eit område på omlag 15x19 meter mellom skulen og fotballbana.

- Det har vore ein draum å jobbe saman med Tom Leonsen i kommunen. Det tok vel berre tre veker frå vi tok kontakt til vi fekk området.

Alle har stilt opp

Saman har ungdommane og foreldregruppa hugd trær og rydda området.

- Vi trudde det berre var å rette ut området litt, men så enkelt var det ikkje, forklarar Madsen.

Under topplaget viste det seg at det låg eit 5-7 meter tjukt lag med blåleire.

- Plutseleg holdt det ikkje med ein 8-tonns gravemaskin og traktor og hengar, seier Madsen.

- Men nokon kjente nokon og plutseleg hadde vi både 20-tonnarar og lastebilar på plass. Masse folk har stilt opp gratis med utstyr og maskiner for å hjelpe oss med å få området klart for støyping.

Madsen trekk fram brannsjef Stein Gjøsund og brannvesenet som kom med tankbilen for å spyle rein skråninga ovanfor plassen då dei såg at det ikkje var noko dei kunne gjera på eigenhand.

Byggjast i Polen

Dugnadsgjengen har ikkje helt bestemt seg kva leverandør dei skal velje, men truleg endar det med at Tress leverer anlegget.

- No treng vi pengar for å kome i mål. Berre transporten av anlegget frå Polen til Noreg kjem på omlag 50 000 kroner.

- Men det skal vi klare, sant?, spør Madsen dei 12-15 skaterane som er med på pressekonferansa.

Og ungdommane er ikkje i tvil. Dei skal klare å skaffe dei penga som trengs. I tillegg til innsamlingsaksjon med bøsser og flaskeinnsamling rett over nyttår håper ungdommane at det finns nokon i næringslivet som vil hjelpe dei å kome i mål.

- Målet er at parken skal stå ferdig når sola står opp etter vinteren, så vi må berre stå på.