– Vi klarte ikkje å koma oss heilt opp på hesten igjen
Kaptein Haga forklarer den dårlege starten på gårsdagens semifinale.
Mens Os G14 tok A-sølv og B-gull i 7-arfotball er Os G19 laget som, av 14 lag frå Os og Nore Neset, har tatt seg lengst i 11-arfotball.
Fredag kveld kunne dei bli første juniorlag frå Os sidan 1978 som tok seg til finale i Norway Cup.
I staden hamna dei under 0-3 og tapte 2-3.
Motstandar Ready skåra på corner i 3., 23. og 28. minutt, den siste etter klarering og nytt innlegg, dei to første var rett i nota.
Os reduserte ved Jakob Øvretveit Larsen på straffe rett før pause og til 2-3 på eit fint angrep i 54. minutt.
– Vi merka allereie i oppvarminga at kvartfinalen tidlegare på dagen hadde tatt på. Det var som om vi allereie hadde spelt finale, seier kaptein Vebjørn Fykse Haga.
Osingane hadde bygd seg opp mentalt til å møta akademilaget Mailantarki frå Nigeria, ein kvartfinale der dei verkeleg måtte kriga for å vinna 1-0.
– Det var som om vi ikkje hadde kome oss heilt opp på hesten igjen til denne kampen, seier Haga.
Sjølv om finalebillett sto på spel, var ikkje tenninga heilt på plass, noko det å sleppa inn tre mål på corner vitnar om.
– Vi var eit betre lag enn Ready spelemessig, men det er ikkje alltid nok til å vinna kampar. Eg såg at gutane ikkje var påskrudde, og dei fekk seg ei oppstramming i pausen, seier trenar Stian Kvåle.
– Dei responderte godt, men du kan ikkje gi vekk tre mål og forventa å ta det igjen.
No blir det bronsefinale på Ekeberg bane 2 klokka 16.55.
Motstandar er Ranheim, som Os tapte 1-3 for i andre kamp i puljespelet.
– Eg håper og trur at dei er revansjelystne, seier Kvåle.
Laget er no «heime» på Scandic Fornebu for å restituera, men skal gå seg ein tur saman før fellesmåltid og avreise til Ekeberg.
– No handlar alt om å få bronsemedalje med oss heim, seier Haga.
