– Vi har eit attraktivt gymnas

–Det er eit uvanleg godt miljø på gymnaset, meiner rektor Trond Eikeland.

– Det er nulltoleranse for mobbing, og elevane er veldig inkluderande og flinke til å ordna opp dersom nokon fell litt utanfor. Elevane trivst og vi scorar grønt over heile linja på elevundersøkinga når det gjeld miljø, supplerar studieinspektør Rune Rosland.

Fekk 25 av 26 moglege seksarar

I vår hadde gymnaset gleda av å uteksaminere kanskje ein av Noregs beste elevar.

– I fjor hadde vi ein elev her med 25 seksarar av 26 moglege på vitnemålet. Det er ikkje slik at vi delar ut seksarar fordi det er kjekt, elevane må fortena dei. Og denne eleven hadde vore igjennom seks av seks moglege eksamenar og fått toppkarakter på alle.

Eikeland fortel at ein annan elev hadde 17 seksarar, og at det var fleire som kunne smykka seg med over ti.

– Førsteklassingane våre er svært tett på eit snitt på fire for å koma inn. Vi er blitt ein utvalsskule. Og dette seier noko om læremiljøet også, og ikkje berre det sosiale.

Går nokre meter ekstra

Skulen kan skilta med eit breitt spekter av lærarar og eit forholdsvis ungt miljø.

– Snittet ligg vel gjerne kring 40 ein stad, og det er god balanse mellom dei erfarne lærarane og dei som er ferskare frå skulen.

– Det er ikkje berre elevane våre som er flinke, men lærarane også. Der er vel knapt nokon av dei som ikkje har mastergrad eller hovudfag. Det er noko som er viktig og som vi vektlegg ved tilsetjing: Kunnskap, ferdigheit og haldningar. Lærarane her på skulen går nokre meter ekstra for elevane våre når det trengst.

Attraktive utanlandsturar

Gymnaset har i fleire år vore med på Erasmus Pluss prosjektet, eit internasjonalt prosjekt der temaet er smittsame sjukdomar over landegrenser. Eit tema som gjerne er ekstra aktuelt no med flyktningestraumen gjennom Europa.

– Prosjektet skal gje felles forståing av land og kulturar i Europa. Med i prosjektet er Latvia, Italia, Tyskland, Nederland og Noreg.

– Faktisk reiser elevar herifrå til Nederland i ei veke, for å delta på prosjektet. I 2017 kjem representantar frå dei andre landa til oss.

Utanom dette er det vanleg at dei som studerer språkfag får reisa på ei lita språkreise til Frankrike, Spania eller Tyskland.

Lokalskule

Til hausten skal gymnaset feira 50-års jubileum.

– Sjølv om skulen er femti år, har vi har gode fasilitetar. Berre skalet står att - elles er alt blitt rusta opp dei seinare åra.

– Os gymnas var i si tid bygd opp av bygda. Lærarane var tilsett i departementet, og fylkeskommunen hadde enno ikkje overteke skulen. Gymnaset har vore viktig for Os-samfunnet, og vi rekrutterar hovudsakleg elevane våre frå Os, Fusa og Tysnes.

– Vi ynskjer å vera ein lokal skule, og vi strekk oss ekstra langt for innbyggjarane i Os-bygda.

– Det ser vi mellom anna i september/oktober kvar haust. Då er det pågang frå foreldre som undersøkjer om det er høve til å flytta poden til oss - til dømes ifrå Bergen.

– Mange ser ut til å tru at dei må gå på Amalie Skram eller Nordahl Grieg i by’n for å få gode karakterar. Dette viser seg gang på gang er feil. Og vi strekk oss så langt vi kan for å gje plass til dei osingane som ynskjer å flytta opp til oss.

– I tillegg er det ingen tvil om at reisevegen til by'n kan verta i meste laget. Men ein treng ikkje gå i by'n for å få gode karakterar, avsluttar inspektøren med klar henvising til fjordårets stjerne-elev.