– Venninna mi får bank

Fredag litt over klokka 23 rykte politiet ut til Meny i Industrivegen.

– Vi hadde fått melding om at fleire personar var innblanda i ein slåstkamp.

– Meldar, ein mann i slutten av 20-åra, sa han frykta at venninna hans fekk bank, fortel politibetjent Anne Lyssand.

Nokre av dei involverte sprang frå staden då politiet svingte inn på parkeringsplassen. Patruljen hadde i utgangspunktet vurdert støtte frå Fana, men fekk kontroll på partane.

– Dei skal ha forklart at dei hadde vore på ein privat fest i nærleiken, der eit par hadde krangla og slåst. På veg til ein annan fest skal det ha oppstått ein ny konflikt, seier Lyssand.

Det er ikkje notert om nokon er skadd eller meldt etter episoden.

Truga med maglite - stal øl

To timar seinare, klokka 01.10, fekk politiet melding frå ein som sa han hadde blitt truga.

– To personar hadde vore i husværet hans og truga han med ein maglite. Dei skal ha stole øl frå han før dei gjekk frå staden, og meldar sa at ein av dei hadde dop i lommene.

Dei to mistenkte skal ha stått ved ein busstopp på Flåten då meldar ringte, men var vekke då politiet kom fram.

– Ein av dei mistenkte har vi fått namn på, den andre er ukjent for meldar.

– Episoden blir sett i samanheng med det som skjedde utanfor Meny tidlegare på kvelden, seier Lyssand.

ID-sjekk av utledningar

I tillegg til å gå fotpatrulje ved AMFI Os på dagtid og kveldstid fekk politiet ei utrykning til staden klokka 21.40.

– Vi fekk melding om nokre utlendingar som forsynte seg av elektronikk i returkontaineren til Elkjøp.

– Dei blei tatt inn til ID-sjekk, både folka i bilen og bilen var OK. Med mindre senterleiinga vil melda dei for tjuveri av returvarer blir det ikkje oppretta sak.

Høg fart og mistanke om promille

Litt før midnatt, klokka 23.43, fekk politiet melding om vinglete kjøring på Hatvikvegen.

– Bilen skal også ha vore nær på å treffa ein annan bil. I bilen sat ein mann med caps, og bilen skal ha kjørt i retning Hegglandsdalen, ifølgje meldar.

Politiet rykte ut, men fann ikkje bilen.

Laurdag morgon, klokka 06.20, stoppa politiet ein bil som skal ha kjørt svært fort ved Tøsdal retning Søfteland.

– Vi hadde ikkje måling på vedkomande, men føraren fekk ei sterk, muntleg korrigering, seier Lyssand.