Vellykka innspeling i Mundheim
Etter 19 dagar kom denne gjengen i mål med spelefilmen «Young and alone».
Bildeserie:
Måndag 3. juli flytta 15 filmfolk inn på garden til Er-An-Linda og mannen Dag.
Dottera Hanne Catrine Andersen har med selskapet sitt, Raggsokk Productions AS hoppa i det, skrive manus, fått støtte av lokale firma og enkeltpersonar, og sett i gang med å få produsert sin eigen 90 minutt lange spelefilm.
• Les òg: Fekk rolle i Hanne sin spelefilm
Laurdag for ei veke sidan var innspelinga ferdig.
– Vi låg i grunnen før skjema heile vegen, med unntak av starten, då vi mangla litt utstyr og mannskap første dag, seier Hanne Catrine, nøgd med tidsplanen ho og innspelingsleiaren hadde laga.
Bambi og brunost
Blant dei involverte var regissør og skodespelarar frå USA.
– Sjølv om vêret ikkje hadde så mykje å seia for produksjonen, var det kjekt at vi hadde så mykje godvêr, spesielt sidan vi hadde utanlandske gjestar.
Dei var overvelda over norsk natur, men etter tre veker sakna dei maten der dei kjem frå.
– Dei likte å prøva nye smakar, men eg trur dei blei litt lei norsk mat etter ei stund. Dei fekk smaka typiske norske varer, som brunost, og dei likte mykje av maten. Men dei hadde litt dårleg samvit då dei fekk smaka hjortegryte, det å eta «Bambi» var ikkje noko særleg, seier Hanne og ler.
15 personar i same hus
På den nedlagte garden har familien hatt ein privat musikkfestival i fleire år, og er vant med å husa mange gjestar.
Denne gong var det 15 personar som budde 19 dagar på garden.
– Det er lenge å bu så tett, men det gjekk veldig fint. På fritida såg vi film og spelte kort, eller tok ein tur til Rosendal.
– Vi måtte òg snu døgnet litt i løpet av produksjonen, då vi hadde filming 6-7 netter.
Dette var blant anna på stadar der dei berre fekk lov å boltra seg etter stengetid, som Er-An Veikro og Oseana.
Reiser til LA i august
All innspeling som skal takast i Noreg er no ferdig. Det som gjenstår er to scenar i USA.
– Eg reiser til Los Angeles i august for å sjå på når desse blir filma, sjølv om eg ikkje er med i scenane, seier manusforfattaren, som sjølv har hovudrolla.
Skodespelarane ho skaffa er ho veldig nøgde med.
– Dei var veldig flinke! Den det sto på var vel meg. Det var travelt å vera vertskap og ha hovudrolle samtidig. Sjølv om eg sjølv har skrive manus så måtte eg jo øva litt på replikkane.
Ein spennande haust
Når ho er i LA skal ho òg møta han som skal klippa filmen, både for å levera innspelt foto og lyd, og for å snakka om jobben.
– Det skal koma to teasarar i september-oktober, mens klipping skal vera ferdig til jul og ferdig film skal stå klar i mai neste år.
Parallelt med produksjonen skal Hanne Catrine halda fram med både distribusjon og finansiering - crowdfunding er allereie i gang.
– Kva med skodespelarkarriera di? Då du budde i USA var du på audition nesten kvar dag, held du fram med å følgja med på nordisk produksjon?
– Ja, og det er ganske mykje som blir produsert i Noreg og resten av Europa. Eg følgjer med og vil halda fram med å prøva å få roller i andre sine filmar. Samtidig har eg så vidt starta på neste manus, fortel Andersen.