Vellukka morgonfiske

Bildeserie:

Full skjerm

1 av 6

I september i fjor gjorde ringnotbåten "Hargun" frå Os eit rekordkast på 1150 tonn NVG-sild. Fem millionar kroner i norsk vårgytande sild blei levert til Lofoten Viking på Værøy.

Måndag var dei ikkje langt unna same volum på same type sild.

- Vi hadde tre kast natt til måndag, på til saman 300 tonn. Vi prøvde oss på eit fjerde rett før det byrja å lysna, og då fekk vi 900 tonn, fortel ein nøgd Hargun-skipper, Rune Garvik, til Midtsiden.no.

Nå lyset kjem forsvinn silda i djupet, men Hargun var akkurat tidleg nok til å sørgja for ein totalfangst på 1200 tonn denne natta.

Meir på kvoten
Hargun har vore på to turar på NVG-silda tidlegare i haust. Den første turen tok dei cirka 700 tonn, førre tur blei det 1093 tonn.

- Vi tok også noko tidlegare, så av kvota på 7200 tonn har vi rundt 1500 tonn igjen å fiska, fortel Garvik.

Makrell først
Før fiskarane frå Søre Øyane prøver å fiska opp meir sild tar dei turen sørover for å fiska resten av makrellkvota.

- Makrellen står langt vest i år, og som kjent har EU stengt sona for norske fiskarar. Dette er eit avtalebrot, og eit møte mellom europeiske og norske politikarar i London torsdag kan få følgjer for fisket vårt dei neste dagane.

Førebels legg Hargun seg i den norske sona, men dei er førebudd på å fiska i EU-sona om det blir opna igjen. Hargun har 660 tonn igjen av kvota på 1800 tonn.

Ute til desember
Går makrellfisket unna i venta tempo skal Hargun til Lofoten igjen for å fiska meir sild.

- Etter dette ventar hestmakrell, og eventuelt fiske på neste års kvote. Vi kjem nok ikkje heim igjen før første veka i desember.

Nye reglar gjer at ein kan fiska 10 prosent av neste års kvote. Klarar du ikkje kvota kan du også skyva 10 prosent av årets kvote over på neste år.

- I fjor fiska vi nokre tonn NVG-sild på årets kvote. Går det bra med resten av fisket kan det godt henda at vi gjer det same i år òg, seier Rune Garvik.

Under kan du sjå fleire bilde frå det gode kastet måndag morgon: