Velkjent opplegg - ny opplesar
Det er klart for ein ny runde med dei populære lesestundene på Oseana, ein laurdagskafé på borna sine premiss.
Våren 2015 starta Oseana opp med Lesestund med graut, eit konsept lånt frå Litteraturhuset i Bergen. Tilbodet har vore svært populært, med opp mot 100 besøkande born og vaksne.
- Tanken er at dette skal vere eit lågterskel drop-in-tilbod for barnefamiliar på tidleg laurdag ettermiddag, der ein enkelt kan bestemme seg for å stikke innom, forklarar Janne Mari Hjelle.
- Dette er ein kafé både for vaksne og born. Borna kan aktivisere seg i form av teiknekrok, putehjørne eller å lytte til høgtlesing. Dei kan også bevege seg rundt i eit ganske stort område utan at foreldre treng å vere redde for at andre kundar sine kaffikoppar skal veltast. Lydnivået treng heller ikkje vere like lågt som på ein vanleg kafe.
Ny formidlar til høgtlesinga
Inkludert i inngangsbilletten ligg servering av risengrynsgraut og saft.
- Grauten fell i smak både hos vaksne og born! Dette er jo ein fin og lett middag mens ein ventar på laurdagstacoen, smiler Hjelle.
Denne våren har Oseana knytta til seg ein ny formidlar til høgtlesinga.
- Vibeke Koehler blir opplesar for oss denne våren. Vibeke har lang erfaring innan formidling til born og unge, mellom anna er ho blant dei faste opplesarane på lesestundene til Litteraturhuset i Bergen. I tillegg har ho vore historieforteljar under Folkets Festspillscene på DNS i 2015, ho driv historieformidling om vikingkrigar, og skriv og overset barne- og ungdomslitteratur. Vi gler oss veldig til å få Vibeke med på laget, avsluttar Hjelle.