– Veldig gode nyhende

Dei politiske partia i formannskapet presenterte tysdag sine framlegg til budsjett for 2014 og investeringar i åra som kjem. Både fleirtalskonstellasjonen med FRP/H/KrF/V og AP skriv i sine framlegg at dei går inn for "Os idrettspark - Kuventræ" slik den er skissert i rapporten som blei presentert i november. TvS signaliserte i same møte at ei ville støtta fleirtalskonstellasjonen sitt framlegg.

Fleirtalet skriv i sitt budsjett følgjande: "FrP/H/KrF/V syner til rapporten ”Os Idrettspark – Kuventræ”, som er eit direkte resultat av vedtak i formannskapssak 80/12. I rapporten skisserer arbeidsgruppe ei utbygging av Kuventræ med ein ny dobbelfleirbrukshall, samt opparbeiding av friidrettsanlegg og omgjering av naturgrasbanene til kunstgrasbane. Samla estimert byggekostnad er sett til brutto 63,8 mill kr. Basert på spelemidlar og eit mindre bidrag frå dugnad/Os Turn vert nettokostnaden som må finansierast av eigenkapital/sponsorar kr 31,1 mill kr.

Koalisjonen legg til grunn at prosjektet skal realiserast, og vil bruke 1.kvartal 2014 til å få på plass ein samla finansieringsplan for tiltaket. Ein vil søkja samarbeid med private aktørar, og vurdere den kommunale eigenkapitalen i høve m.a. forventa overskot på drifta i 2013. Målsettinga er å realisere prosjektet i 2014-16. Eiga sak vert å fremja for formannskap og kommunestyre våren 2014."

Arbeiderpartiet legg til grunn i sitt framlegg følgjande: "Os Arbeiderparti ønsker at plan for videre utvikling av Kuventræ Sentralidrettsareana gjennomføres med ny dobbel flerbrukshall og friidrettsanlegg."

Jubel på Kuventræ

Dagleg leiar i Os Turn, Hans Parnefält, jublar når han får høyre innstillinga frå politikarane.

– Dette er veldig gode nyhende.

– No er det berre å gå i gang med å planleggja dugnadsarbeidet med ein gong.

– Rammeverket ligg der, vi kan berre gå i gang med å rydda området sør for grasbanen og henta inn dugnadsfolk på same måte som kommunen skal henta inn sponsorar.

– Det er inga grunn til å venta, seier ein ivrig Parnefält.