Vårteikn vassa i snø

Det er ikkje berre hoggorm og kublome som har vist seg etter ein varm februar, og ein snørik start på mars.

Torsdag 9. mars såg naturfotograf Oddmund Lunde tjeld for første gong i år.

– Dei eg såg gjekk og vassa i snø på eit skjer, fortel Oddmund.

Tjeld, som er nasjonalfuglen på Færøyane, plar vera ein av dei tidlegaste som kjem tilbake til Norge på våren.

I alt er det 30.000 til 50.000 par med tjeld i Norge, dei fleste langs kysten. Tjeld et skjel, gjerne 300 om dagen.

Tjelden frå Norge overvintrar ofte aust i England og rund Vadehavet (frå Nederland til Danmark).

I Vadehavet overvintrar også grågåsa, og torsdag var også denne innan rekkevidde for objektivet til Lunde.